Kryeministri i Kosovës, Albin Kurti, njoftoi të mërkurën se vendi ka filluar procesin e hapjes së një fabrike prodhimi municionesh dhe projektimi dronësh.
“Një ushtri që, në një kohë kaq të shkurtër, është armatosur kaq sa e jona, duhet të sigurojë dhe garantojë funksionalitet të plotë dhe qëndrueshmëri të përgjithshme. Prandaj, sot hedhim hapat e parë për ngritjen e një industrie ushtarake”, tha Kurti.
Ministri i Mbrojtjes Ejup Maqedonci tha se një komision ndërministror i udhëhequr nga ai do të “finalizojë kontratën për fillimin e punës për hapjen e fabrikës”.
“Ne po nisim një epokë të re të mbrojtjes dhe sigurisë, duke krijuar qëndrueshmëri edhe në prodhimin dhe furnizimin e sistemeve të armëve”, tha Maqedonci, duke shtuar se qeveria është koordinuar me partnerët e saj ndërkombëtarë, përfshirë SHBA-në, dhe ka marrë një “raport fizibiliteti” nga Ministria e Mbrojtjes e Turqisë.
Kjo do të ishte fabrika e parë shtetërore e prodhimit të armëve në Kosovë, e cila, shtoi Maqedonci, “nuk do ta ndalë sektorin privat. Të gjitha kompanitë inkurajohen të hapin fabrika të tilla. Sot, më shumë se kurrë, bota ka nevojë për rimbushjen e rezervave të municioneve dhe armëve, por edhe për krijimin e rezervave, duke pasur parasysh situatën aktuale të sigurisë”.
Sipas Maqedoncit, laboratori do të projektojë dronë me qëllim që “në të ardhmen ata të mund të prodhohen në vendin tonë”.
Forca e Sigurisë së Kosovës, FSK, u themelua më 1 janar 2009. Të mërkurën, duke shënuar ditën e FKS-së, FSK-ja hapi dyert e saj për publikun për të demonstruar aftësitë dhe kapacitetet e saj ushtarake.
Edhe pse NATO-ja nuk e mbështet lëvizjen e Kosovës për ta bërë FSK-në një ushtri të rregullt, Kosova po bën marrëveshje me shtete individuale anëtare të NATO-s, duke përfshirë SHBA-në, Turqinë, Britaninë e Madhe dhe Gjermaninë, për të arritur të njëjtin qëllim në praktikë.
