Fadil Fazliu, Isni Kilaj dhe Bashkim Smakaj u arrestuan të enjten në Kosovë, raportojnë mediat, teksa Zyra e Prokurorit të Specializuar në Hagë hetoi pretendimet për “vepra penale kundër administrimit të drejtësisë”. Arrestimet nuk janë konfirmuar nga Zyra e Prokurorit të Specializuar në Hagë.
Zyra e Prokurorit të Specializuar, e mbështetur nga misioni i BE-së për sundimin e ligjit në Kosovë, bastisi gjithashtu shtëpinë e ish-ministrit të Drejtësisë Hajredin Kuçi. Disa media kanë raportuar gjithashtu arrestimin e Kuçit, por BIRN nuk mundi ta konfirmonte këtë.
Kuçi është edhe ish-zv/kryeministër. Kilaj është ish-kryetar i Komunës së Malishevës dhe Smakaj është ish-kryetar i Agjencisë së Kosovës për Inteligjencë, AKI.
“…Zyra e Prokurorit të Specializuar po kryen operacione të vazhdueshme në Kosovë në një hetim që fokusohet në vepra penale kundër administrimit të drejtësisë”, njoftoi Zyra e Prokurorit të Specializuar.
“Operacionet e Zyrës së Prokurorit së Specializuar janë autorizuar nga ana gjyqësore nga Dhomat e Specializuara të Kosovës dhe janë mbështetur nga Misioni i Bashkimit Evropian për Sundimin e Ligjit në Kosovë (EULEX)”, shtoi ajo. Ajo nuk pranoi t’i jepte BIRN-it më shumë informacione mbi të arrestuarit apo akuzat specifike kundër tyre.
Avokati i Fazliut, Skënder Musa, tha për BIRN: “Ne dimë vetëm që ai është arrestuar, asgjë tjetër. Ai u arrestua para shtëpisë së tij, ndërsa shkonte në punë.” Djali i Fazliut tha për BIRN se babai i tij u arrestua në orën 8 të mëngjesit dhe familja nuk ka informacione të mëtejshme.
Në nëntor 2023, Dhomat e Specializuara të Kosovës në Hagë urdhëruan disa bastisje në Kosovë në shtëpitë e aleatëve dhe këshilltarëve të ish-presidentit Hashim Thaçi, i cili po gjykohet në Hagë për krime lufte dhe krime kundër njerëzimit.
Bastisjet ishin pjesë e hetimeve për pengimin e mundshëm të drejtësisë, duke përfshirë disa prej të arrestuarve të enjten.
Gjatë bastisjeve të vitit 2023, Kilaj u arrestua për herë të parë. Në nëntor 2023, gjyqtari i procedurës paraprake deklaroi: “Ekziston dyshimi i bazuar se z. Kilaj ka kryer vepra penale kundër administrimit të drejtësisë që janë nën juridiksionin e Dhomave të Specializuara, duke përfshirë pengimin e personave zyrtarë në kryerjen e detyrave zyrtare… dhe shkeljen e sekretit të procedurës”.
Gjykatësi Nicolas Guillou shtoi se kishte gjithashtu arsye për të dyshuar për rrezikun e arratisjes, ose se Kilaj do të “fshihte, ndryshonte ose falsifikonte provat e një krimi”, ose “të pengonte ecurinë e procedimit penal duke ndikuar te dëshmitarët, viktimat ose bashkëpunëtorët”.
Në maj të vitit 2024, Dhomat e Specializuara thanë se Kilaj ishte liruar me kushte të rrepta, pasi Zyra e Prokurorit të Specializuar kërkuan pezullimin e aktakuzës, për të ngritur një aktakuzë të ndryshuar. Ajo tha se procedurat po vonoheshin gjerësisht dhe Kilaj mbetej një i dyshuar që nuk mund të largohej nga Kosova nëse nuk lejohej nga gjykata, e cila mbante dokumentet e tij të udhëtimit.
Ai duhej të bënte të ditur adresën e tij në gjykatë, të merrte pjesë në seancat nëse thirrej dhe të mos bënte asnjë deklaratë publike për gjykatën, Zyrën e Prokurorit të Specializuar apo procedura të tjera. Lirimi me kusht ishte 30 mijë euro.
Djali i Kilajt tha për televizionin kosovar T7 të enjten: “Na u tha se prokuroria do të japë informacione të mëtejshme pasi të arrestuarit të mbërrijnë në Hagë. Fillimisht, ai u mbajt në zyrat e EULEX-it në Kosovë dhe më pas ata deklaruan se do të niseshin për në Hagë.”
Dhomat e Specializuara të Kosovës po gjykojnë luftëtarë të UÇK-së të kohës së luftës për akuza për krime lufte. Ato janë pjesë e sistemit gjyqësor të Kosovës, por ndodhen në Hagë dhe përbëhen nga staf ndërkombëtar.
Dhomat u krijuan nën presionin e aleatëve perëndimorë të vendit, të cilët besonin se sistemi i drejtësisë së Kosovës nuk ishte mjaftueshëm i fuqishëm për të gjykuar rastet e lidhura me UÇK-në dhe për të mbrojtur dëshmitarët nga kanosja. Shumë shqiptarë të Kosovës besojnë se gjykata është e njëanshme dhe denigron luftën e drejtë të UÇK-së kundër represionit serb.
