Ish-presidenti i Kosovës, Hashim Thaçi, dhe të bashkë-akuzuarit Fadil Fazliu dhe Bashkim Smakaj u paraqitën në gjykatë në Dhomat e Specializuara të Kosovës në Hagë të dielën për akuzat për pengim të drejtësisë dhe ndërhyrje te dëshmitarët në gjyqin në vazhdim të Thaçit për krime të dyshuara lufte dhe krime kundër njerëzimit.
Gjyqtarja e procedurës paraprake Marjorie Masselot i la të tre në paraburgim për dy muaj, duke thënë se ekziston rreziku që ata të arratisen, të pengojnë procedimet gjyqësore ose të përsërisin veprat. Megjithatë, Thaçi tashmë ndodhet që më parë në paraburgim.
Thaçi i tha gjykatës se aktakuza e re ishte e papritur dhe se ai nuk mund të deklarohet menjëherë për shkak se ende nuk ka qenë në gjendje t’i diskutojë tërësisht akuzat e reja.
Mbrojtja e tij argumentoi se ai nuk do t’i ikë drejtësisë, duke vënë në dukje se ai dha dorëheqjen si president në vitin 2020 për t’u përballur me akuzat kundër tij.
“Edhe sot une respektoj dhe besoj në Kushtetutën dhe ligjet e Kosovës”, tha Thaçi.
Gjykatësja Masselot hodhi poshtë propozimin që Smakaj, ish-drejtuesi i Agjencisë së Kosovës për Inteligjencë, të lirohet me kusht prej 5,000 eurosh.
Ashtu si Thaçi, Smakaj vendosi të mos deklarohet për akuzat ndaj tij të dielën sepse i duhej më shumë kohë për të shqyrtuar akuzat, duke thënë se “nuk i kam të gjitha materialet e nevojshme për t’u deklaruar sot”.
I vetmi i pandehur që u deklarua për akuzat ndaj tij ishte Fazliu, i cili tha: “Unë jam i pafajshëm. Deklaroj se nuk jam fajtor.”
Në këtë rast akuzohen edhe dy të pandehur të tjerë – Isni Kilaj, ish-kryetar i Komunës së Malishevës, dhe Hajredin Kuçi, ish-ministër i drejtësisë dhe ish-zv/kryeministër. Dalja e tyre e parë në gjykatë është caktuar për të hënën.
Smakaj, Fazliu, Kilaj dhe Kuçi u arrestuan në Kosovë më 5 dhjetor.
Dhomat e Specializuara po gjykojnë luftëtarët e Ushtrisë Çlirimtare të Kosovës të kohës së luftës për akuzat për krime lufte. Gjykata me bazë në Hagë është pjesë e sistemit gjyqësor të Kosovës, por e vendosur në Hagë dhe e pajisur me personel ndërkombëtar, pjesërisht për shkak të frikës se dëshmitarët mund të kanosen pas incidenteve në gjyqet e mëparshme të lidhura me luftën në Kosovë në gjykatën e OKB-së për krimet e luftës në Jugosllavi.
Dhomat e Specializuara u krijuan nën presionin e aleatëve perëndimorë të vendit, të cilët besonin se sistemi i drejtësisë në Kosovë nuk ishte mjaftueshëm i fuqishëm për të gjykuar rastet e lidhura me UÇK-në dhe për të mbrojtur dëshmitarët. Megjithatë, shumë shqiptarë të Kosovës besojnë se gjykata është e njëanshme dhe denigron luftën e drejtë të UÇK-së kundër represionit serb.
Në gjyqin e tij në vazhdim, Thaçi akuzohet për përgjegjësi individuale dhe komanduese për krime lufte dhe krime kundër njerëzimit gjatë luftës së Kosovës 1998-1999, së bashku me tre të bashkë-akuzuar të tjerë. Ata të gjithë janë vetëdeklaruar të pafajshëm.
