Gjykata e Posaçme e Apelit vendosi të martën më 17 dhjetor heqjen e sekuestros preventive të vilës së nënës së Monika Kryemadhit. Në njoftimin e shpërndarë për mediat thuhet se vendimi u mor nga gjyqtarja Igerta Hysi, e cila miratoi vendimarrjen e Shkallës së Parë, por duke rrëzuar kërkesën e SPAK për vendosjen e masës së sigurimit pasuror “sekuestro preventive” mbi vilën me kat përdhe me sipërfaqe 152 m2, nga të cilat 82 m2 banesë dhe verandë 70 m2, me kat nëntokë 139 m2, katin e parë 79 m2 dhe kain e dytë 51 m2 + verandë 27.9 m2, në pronësi të Fatime Kryemadhit.
Më 20 tetor, Gjykata e Posaçme e Shkallës së Parë pranoi kërkesën e SPAK për sekuestrimin e dy vilave me sipërfaqe të njëjta në pronësi të Monika Kryemadhit dhe nënës së saj, Fatime Kryemadhi në vendin e njohur si “Kodra e Diellit” në Tiranë. Sipas SPAK, kjo masë u mor në vijim të hetimeve të filluara në vitin 2022 ndaj kryetarit të Partisë së Lirisë dhe ish-presidentit të Republikës së Shqipërisë, Ilir Meta e ish-bashkëshortes së tij, Monika Kryemadhi.
Meta akuzohet nga Prokuroria e Posaçme për tre çështje korrupsioni; për dosjen e njohur si CEZ-DIA; për përfitimin e vlerave monetare në këmbim të influencës së ushtruar në favor të një kompanie telekomunikacioni; si dhe për marrëdhënien e dyshuar korruptive me bizmesmenin Samir Mane për marrjen përsipër të ndryshimit në favor të tij të një ligji në Kuvendin e Shqipërisë.
Ish-presidenti Meta akuzohet gjithashtu për kontratat e konsulencës dhe lobimit në Shtetet e Bashkuara të Amerikës, pastrimin e produkteve të veprës penale në blerjen e një shtëpie në Tiranë si dhe mosdeklarimin e shpenzimeve mjekësore për periudhën 2013-2019. Meta i ka mohuar akuzat dhe ka kërkuar revokimin e masës së sigurisë “arrest me burg” në gjykatë.
Akuza të ngjashme ka ngritur SPAK edhe ndaj deputetes Monika Kryemadhi, njëherazi bashkëshorte dhe bashkëpunëtore për dekada e Metës, të cilët ndodhen tashmë në një proces divorci. Kryemadhi po hetohet në gjendje të lirë.
Ish-kreu i AKEP, Pirro Xhixho ndodhet detyrim paraqitje për akuzën e korrupsionit pasiv. Në të njëjtën masë sigurie po hetohet për pastrim parash edhe Ema Çoku, një financuese e LSI-së.
