Gjykata e Posaçme e Apelit njoftoi të enjten se kishte vendosur prishjen e vendimit ndaj ish-ministrit Lefter Koka, ish-deputetit të Partisë Socialiste Alqi Bllako, të arrratisurit Klodian Zoto dhe 12 të pandehurve të tjerë të akuzuarve për abuzime, shpërdorim detyre e korrupsion në atë që njihet si afera e inceneratorit të Fierit dhe kthimi e dosjes për rigjykim në shkallën e parë me trupë të ndryshme gjykuese.
Vendimi u mor pas ankimit të Prokurorisë së Posaçme që kundërshtoi masën e dënimit dhe pafajësinë e disa prej të akuzuarve. SPAK ushtroi ankim ndaj vendimeve të dhëna nga Gjykata e Posaçme e Shkallës së Parë, për pafajësitë e pjesshme, si dhe për uljen e vlerës së korrupsionit. Prokurori Dritan Prençi kërkoi thirrjen dhe marrjen e deklarimeve të pesë dëshmitarëve dhe një të pandehure, si dhe vlerësimin e provave nga ana e trupit gjykues të Apelit, duke e cilësuar të gabuar vlerësimin e kryer nga Shkalla e Parë.
Vendimi është ankuar po ashtu edhe nga të pandehurit të cilët këmbëngulin në pafajësi.
Pasi dëgjoi palët në dy seanca dhe thirri dëshmitarë Gjykata e Apelit mori vendimin për të rikthyer çështjen për gjykim. “Prishjen e vendimit nr.57, datë 25.09.2023 të Gjykatës së Posaçme të Shkallës së Parë për Korrupsionin dhe Krimin e Organizuar, dhe kthimin e akteve kësaj gjykate me tjetër trup gjykues. Kundër këtij vendimi mund të bëhet rekurs në Gjykatën e Lartë brenda 20 (njëzet) ditëve nga e nesërmja e njoftimit të tij”, thuhet në vendimin e Apelit marrë nga trupa e përbërë nga gjyqtarët Engert Pëllumbi, kryesues, Dhimitër Lara dhe Miliana Muça anëtarë.
Skandali i incineratorëve nisi në vitin 2014 me një vendim të qeverisë për të shpallur një emergjencë mjedisiore, si justifikim për të dhënë koncesionin e incineratorit të Elbasanit. I njëjti grup kompanish mori më pas koncesion për incineratorin e Fierit dhe atë të Tiranës. Dy dyzina me zyrtarë dhe biznesmenë janë arrestuar ose janë shpallur në kërkim për çështjen, përfshirë ish-ministrin e Mjedisit, Lefter Koka dhe ish-deputetin socialist Alqi Bllako.
Një muaj më parë Gjykata e Posaçme e Apelit la në fuqi fajësinë dhe ashpërsoi dënimet për Kokën, Bllakon e të tjerë të akuzuar në aferën e incenertorit të Elbasanit. Ndërkohë çështja për inceneratorin e Tiranës është e ndarë në disa dosje dhe është në proces hetimi e gjykimi.
