Në një sallë gjysëm të boshatisur pas një seance të gjatë parlamentare deputetët e mazhorancës rrëzuan me 61 vota kundër dhe 12 abstenim projektvendimin “Për dërgimin e mocionit në Gjykatën Kushtetuese për konstatimin e papajtushmërisë dhe mbarimit të mandatit të deputetit Vullnet Sinaj”.
Në mesin e votave kundër ishte dhe ajo e deputetit të Partisë Demokratike Bujar Leskaj. “Në mendimin tim është një çështje me shkallë të ulët materialiteti, pra çështje që nuk mund të cënojë mandatin e një deputeti cilësdo forcë politike që të përfaqësojë”- i tha Leskaj BIRN-it duke argumentuar qëndrimin e tij.
Sipas Leskajt, asnjë nga firmëtarët e kërkesës nuk ndodhej në sallën e Kuvendit gjatë votimit, çka sipas tij, “e vendos në pikëpyetje kërkesën e tyre”.
Gjatë shqyrtimit të mocionit në Këshillin e Mandateve dhe Rregullores mazhoranca nuk shfaqi ndonjë kundërshtim për plotësimin e aspekteve formale të mocionit të deputetëve të opozitës dhe nuk deklaroi një qëndrim politik publik në mbrojtje të deputetit të Vlorës.
Në mocionin e saj, opozita pretendon se çështja e Sinajt paraqet një rast të pastër të konfliktit të interesit krahasuar me rastet e tjera që janë shqyrtuar më herët nga gjykata.
Provat e sjella në mocion janë disa fatura blerjesh nga institucione publike pranë rrjetit të supermarketeve “Big Market” në pronësi të Sinajt, që kapin shifrën 3.6 milionë lekë.
Gjatë seancave dëgjimore në Këshillin e Mandateve Sinaj nuk i pranoi akuzat duke i quajtur këto blerje rastësore, ndërsa avokatja e tij cilësoi provat e paraqitura në mocion si të pamjaftueshme për të provuar shkeljen e Kushtetutës nga deputeti.
Kërkesa e deputetëve të PD-së bazohej në nenin 70, pika 3, të Kushtetutës së Shqipërisë sanksionon se “Deputetët nuk mund të kryejnë asnjë veprimtari fitimprurëse që buron nga pasuria e shtetit ose e pushtetit vendor dhe as të fitojnë pasuri të këtyre.”
Ky është mocioni i dytë brenda kësaj legjislature që rrëzohet nga PS, pas mocionit ndaj deputetes Olta Xhaçka, bashkëshorti i së cilës përfitoi statusin “investitor strategjik” dhe plazhin para hotelit në Dhërmi.
Në rastin e Xhaçkës, socialistët e mbrojtën me forcë mosdërgimin e mandatit të saj për interpretim në Gjykatën Kushtetuese duke shkelur dhe dy vendime të saj, përkundër konstatimeve të gjykatës se këto qëndrime “cënojnë themelet e shtetit” dhe janë “shkelje të rënda të Kushtetutës”.
Në fillim të dhjetorit Komisioni i Venecias i dha të drejtë Gjykatës Kushtetuese duke i cilësuar vendimet e saj të detyrueshme për Kuvendin, por socialistët e lexuan opinionin sipas interesit të tyre, duke u fokusuar tek një përkufizim për lirinë e deputetit për të votuar.
Gjatë kësaj seance mazhoranca rrëzoi po ashtu kërkesën e opozitës për ngritjen e komisionit hetimor për kontrollin e ligjshmërisë në procedurat e miratimit të projektit “Marina & Jahtet e Durrësit”, shitjes së koncesionit të menaxhimit të portit dhe procedurat për ndërtimin e portit të ri në Porto Romano.
Ndërkohë me 73 vota pro socialistët votuan zgjatjen e efekteve të ligjit kontravers “Për investimet strategjike” deri në dhjetor 2026.
