Agjencia e Mbikqyrjes Policore, AMP njoftoi të premten se kishte ekzekutuar katër masa sigurie të vendosura ndaj katër punonjësve të policies, të akuzuar për shkelje të barazisë në tendera. Sipas drejtorit të AMP, Florian Sulejmani, katër efektivët, dy prej të cilëve kanë mbajtur funksionin e shefit në sektorin ekonomik e të kontabilitetit në Drejtorinë Vendore të Policisë Tiranë dhe dy specialistë po të kësaj zyre, janë proceduar për dy procedura prokurimi në vlerë 1.7 milionë lekë.
Në njoftim thuhet se ish-shefi i sektorit ekonomik në Drejtorinë e Policisë së Tiranës, i cili është larguar nga detyra me kërkesën e tij, dyshohet se ka kryer veprat penale të shkeljes së barazisë në tendera dhe falsifikim të vulave, stampave dhe formularëve. Ndaj tij gjykata ka caktuar masën e sigurimit personal “detyrim për t’u paraqitur në policinë gjyqësore”.
Ndaj shefit të sektorit të kontabilitetit është caktuar masa e pezullimit të ushtrimit të detyrës dhe ndalimit të daljes jashtë shtetit, me dyshimin e shkeljes së barazisë në tendera.
Të njëjtat masa sigurimi janë caktuar dhe ndaj specialistit të kësaj zyre. Hetimi për abuzimet në dy procedurat e prokurimit ka filluar në vitin 2024.
