Prokuroria e Posaçme Kundër Korrupsionit dhe Krimit të Organizuar, SPAK, kërkoi të premten më 28 shkurt deklarimin fajtor të ish-deputetit socialist Alqi Bllako për korrupsion pasiv në dy raste lidhur me aferën e inceneratorit të Tiranës dhe dënimin e tij me 5 vjet heqje lirie, që në aplikim të gjykimit të shkurtuar i reduktohet 1/3-ta e masës, duke mbetur 3 vjet e 4 muaj. Po ashtu, u kërkua dënimi plotësues për të mos ushtruar funksione publike për 5 vjet.
Seanca u shty për më datë 7 mars në orën 13:00, kur mbrojtja e Bllakos do të paraqesë konkluzionet përfundimtare.
Hetimet për Bllakon në këtë çështje lidhen me kontratën koncesionare të vitit 2017 për ndërtimin e landfillit, inceneratorit dhe rehabilitimin e vend-depozitimeve ekzistuese në Tiranë, të lidhur mes Ministrisë së Mjedisit dhe shoqërisë koncesionare “Integrated Energy B.V SPV” sh.p.k.
Sipas prokurorisë, Bllako i ka propozuar Vladimir Bezhanit të vazhdonte detyrën si këshilltar i jashtëm i ministrit të Mjedisit, Lefter Koka dhe të ndihmonte me konsulencë juridike gjatë kohës kur kishte lindur idea e projektit të zhvillimit të procedurës së dhënies së koncesionit. Për shërbimin e Bezhanit si këshilltar i jashtëm i ministrit të Mjedisit, Bllako akuzohet se i ka kërkuar aksionerit të shoqërisë propozuese “Integrated Technology Services” sh.p.k, Klodian Zoto, njëkohësisht dhe aksioner i shoqërisë koncesionare “Integrated Energy BV SPV” sh.p.k, që të jepte përfitimin e parregullt për shtetasin Vladimir Bezhani, duke e punësuar fiktivisht tek shoqëria “Integrated Technology Services” sh.p.k. dhe siguruar një përfitim në vlerën 7. 5 milionë lekë.
Gjatë kohës që Bezhani ishte këshilltar i Kokës, ka mbajtur kontakte me Klodian Zoton sipas orientimit të Alqi Bllakos duke i siguruar të dhëna të marra nga autoriteti kontraktor. Bllako akuzohet gjithashtu se ka përfituar në mënyrë të tërthortë shumën prej 119,715 eurosh nga Klodian Zoto dhe Mirel Mërtiri, pronarët de facto të shoqërisë koncesionare, për blerjen e një pajisjeje për aktivitetin tregtar të babait të tij në Ersekë.
Në një gjykim paralel për të njëjtën çështje SPAK ka kërkuar deklarimin fajtor të ish-ministrit të Mjedisit, Lefter Koka dhe dënimin e tij me 4 vjet burg – dënim i cili reduktohet në 2 vjet e 8 muaj në aplikim të gjykimit të shkurtuar. E njëjta masë dënimi u kërkua edhe për Erjon Murataj, Bledar Karoli, Taulant Tusha dhe Namik Simixhiu. Po ashtu, u kërkua dhe vendosja e dënimit plotësues për heqjen e të drejtës për të ushtruar funksione publike për pesë vjet.
Për të pandehurit Jetmir Llapaj, Sidita Kopliku dhe Valbona Ballgjini u kërkua dënimi me nga dy vjet burg, që në aplikim të gjykimit të shkurtuar, masa përfundimtare e dënimit mbetet 1 vit e 4 muaj heqje lire. Për dy të pandehurat Ballgjini dhe Kopliku, SPAK kërkoi pezullimin e dënimit dhe vendosjen e tyre në shërbim prove për 4 vjet. Edhe në këtë rast, u kërkua caktimi i dënimit plotësues për heqjen e të drejtës për të ushtruar funksione publike për 5 vjet.
Skandali i inceneratorëve filloi në vitin 2014 me një vendim të qeverisë ‘Rama’ për shpalljen e një emergjence mjedisore, që justifikoi dhënien e koncesionit të inceneratorit të Elbasanit. Më pas, të njëjtat kompani morën koncesione për inceneratorët e Fierit dhe Tiranës. Ish-Ministri i Mjedisit Lefter Koka dhe ish-deputeti Alqi Bllako janë gjetur fajtorë në çështjet e inceneratorit të Fierit dhe atë të Elbasanit. Vendimi për inceneratorin e Elbasanit ka marrë formë të prerë, ndërsa çështja e Fierit u kthye për rigjykim nga Apeli i Posaçëm.
