Prokuroria e Fierit njoftoi të premten konfiskimin e pasurive me vlerë të llogaritur në 1.8 milionë euro në pronësi të një shtetasi nga Fieri dhe personave të lidhur me të, që dyshohet se kanë si burim krijimi të ardhurat e përfituara nga trafiku dhe shitja e lëndëve narkotike.
Hetimi pasuror ka filluar në vitin 2024, prej nga ka rezultuar se pasuritë të shumta të shtetasit Arbër Muça dhe të personave të lidhur me të, nuk justifikohen me burime financiare të ligjshme. “…Rezultoi ekzistenca e një disproporcioni të konsiderueshëm ndërmjet nivelit të pasurisë së krijuar, zotëruar apo administruar nga subjektet e përfshira dhe kapaciteteve të tyre ekonomike të provuara nga burime të ligjshme,” thuhet në njoftim.
Po ashtu, nga hetimi është arritur në përfundimin se disa pasuri, megjithëse ishin regjistruar formalisht në emër të personave të tjerë, kontrolloheshin ose administroheshin faktikisht nga Muça. Personat e lidhur dyshohet se kanë shërbyer për maskimin e pronarit real dhe fshehjen e origjinës së fondeve të përdorura.
Gjykata e Shkallës së Parë të Juridiksionit të Përgjithshëm, Fier, me kërkesë të prokurorisë ka vendosur konfiskimin dhe kalimin në pronësi të shtetit tre njësi me vendodhdje në qytetin e Fierit, me sipërfaqe totale 925.1 m2; tre troje në Fier me sipërfaqe 630 m2; një apartament me sipërfaqe totale 127.4 m2 në Tiranë dhe një vendparkim 30.14 m2 po në kryeqytet. Po ashtu, jane konfiksuar 11 automjete luksoze të prodhura vitet e fundit, mes të cilave të llojeve Lamborghini Urus, Mercedes Benz e BMW, si dhe një autobus. Gjykata ka vendosur konfiskimin edhe për gjashtë llogari bankare me gjendje 54 mijë e 851 euro dhe 5 milionë e 739 mijë lekë.
Prokuroria bënë me dije se në kuadër të këtij procedimi penal ka evidentuar edhe pasuri të tjera të konsiderueshme, për të cilat po hetohet për pastrim parash.
