Prokuroria e Bosnjës dhe Hercegovinës lëshoi të mërkurën një urdhër arresti për Milorad Dodik, president i entitetit të Republikës Srpska të udhëhequr nga serbët, dhe dy të tjerë, duke i akuzuar ata për “sulm ndaj rendit kushtetues” të Bosnjës dhe Hercegovinës, njoftuan mediat.
Masa erdhi pasi Dodik, kryeministri i Republikës Srpska Radovan Viskoviç dhe kryetari i Asamblesë Kombëtare të Republikës Srpska, Nenad Stevandiç, nuk iu përgjigjën dy thirrjeve për t’u marrë në pyetje.
Nuk ka asnjë konfirmim zyrtar të urdhrit të arrestit nga Prokuroria apo nga institucione të tjera. Lajmi u raportua fillimisht nga Alternativna Televizija, nga televizioni i entitetit të Republikës Srpska, RTRS, dhe nga media pranë Dodikut.
Një burim nga policia e Republikës Srpska pohoi se forca nuk kishte marrë asnjë urdhër. Detajet e plota të akuzave nuk janë bërë ende publike.
Radovan Kovaceviç, një zëdhënës i partisë së Dodikut, Aleanca e Social Demokratëve të Pavarur, SNSD, i cili është gjithashtu deputet në parlamentin shtetëror të Bosnjës, mohoi që Dodik apo Republika Srpska të kishin “sulmuar” rendin kushtetues të Bosnjës.
“Askush nuk do të arrestojë apo mund të arrestojë lidershipin shtetëror të Republikës Srpska. Republika Srpska nuk po sulmon rendin kushtetues; përkundrazi, ajo po merr vendime që ka të drejtë t’i marrë, bazuar në kushtetutën e Bosnjës dhe Hercegovinës dhe Republikës Srpska”, tha Kovaçeviçi.
Çështja u hap pas vendimit të gjykatës shtetërore për Dodikun më 26 shkurt, kur ai u dënua me një vit burg dhe gjashtë vjet ndalim për të mbajtur postin presidencial për kundërshtimin e vendimeve të Përfaqësuesit të Lartë, i cili është mbikëqyrësi ndërkombëtar i paqes në Bosnje.
Në përgjigje të kësaj, asambleja e Republikës Srpska miratoi ligje që ndalojnë prokurorinë në nivel shtetëror, gjykatën në nivel shtetëror, Agjencinë Shtetërore për Hetim dhe Mbrojtje, SIPA dhe Këshillin e Lartë Gjyqësor dhe Prokurorial, të ushtrojnë çdo juridiksion në entitet.
Gjykata Kushtetuese e Bosnjës i pezulloi përkohësisht këto ligje më 6 mars, në pritje të një vendimi përfundimtar, por Dodik këmbënguli që ligjet e reja do të zbatoheshin në entitet.
Prokuroria mund t’i thërrasë dy herë individët për t’i marrë në pyetje. Nëse ata nuk përgjigjen, mund të lëshohet një urdhër për ndalimin e tyre.
Nëse Dodik, Stevandiç dhe Vickoviç e kundërshtojnë ndalimin, kjo mund të pasohet një urdhër arresti kombëtar. Nëse nuk kapen brenda Bosnjës, mund të lëshohet një urdhër arresti nga Interpoli.
