Një punonjës 59 vjeç humbi jetën dhe një tjetër mbeti i plagosur gjatë çmontimit të një skele të premten, në një objekt në ndërtim në Qerret, Kavajë. 24 orë pas ngjarjes Policia Vendore në Durrës bëri me dije se ndaloi drejtuesen teknike të punimeve dhe shpalli në kërkim sipërmarrësin dhe inxhinierin për shkelje të rregullave të mbrojtjes në punë.
59-vjeçari humbi jetën si pasojë e rrëzimit të një trari prej druri gjatë çmontimit të skelave të ndërtimit në një pallat.
“Rreth orës 15:30, (të premten) në Urgjencën e Spitalit Rajonal Durrës, është dërguar pa shenja jete shtetasi H. P. rreth 59 vjeç, i cili ka qenë duke punuar në Qerret Kavajë, në një pallat”, njoftoi policia e Durrësit rreth ngjarjes.
Si pasojë e rënies së trarit u dëmtuar në këmbë punonjësi tjetër me inicialet S.H, 36 vjeç. Policia tha se në përfundim të veprimeve të para hetimore të kryera në lidhje me ngjarjen u arrestua sipas policisë në flagrancë një 68-vjeçare me inicialet E. Xh., banuese në Tiranë, me detyrë drejtuese teknike e punimeve.
Ndërsa, sipas policisë u shpall në kërkim administrator i firmës dhe inxhinieri i punimeve.
“Po në lidhje me ngjarjen, në përfundim të hetimeve të para u bë shpallja në kërkim për veprën penale “Shkelja e rregullave të mbrojtjes në punë” e shtetasit E. D., 53 vjeç, banues në Golem, Kavajë, me detyrë administrator i firmës dhe njëkohësisht sipërmarrës i punimeve ne pallat, dhe e shtetasit M. Sh., 31 vjeç, banues në Tiranë, me detyrë inxhinier i kompanisë së ndërtimit”, njoftoi policia.
Siguria në punë mbetet një nga problemet më shqetësuese në Shqipëri, sidomos në sektorë si ndërtimi, minierat dhe energjia elektrike. Vetëm në këto dy javë të prillit, tre punëtorë humbën jetën dhe dy të tjerë janë raportuar të plagosur. Veç ngjarjes së rëndë në Qerret, një elektricist mbeti i vdekur në Divjakë më 14 prill gjatë punimeve për riparimin e një linje të tensionit të mesëm. Policia bëri me dije se 32-vjeçari kishte rënë në kontakt me rrymën. Ndërkohë më 19 prill një 48-vjeçar u vra nën gurët e një galerie minerare në Martanesh. Një 71-vjeçar u plagos një javë më parë në guroret e Dimalit, ndërsa një 36-vjeçar u plagos pas shembjes së skelave në Qerret.
