Prokuroria e Përgjithshme dhe SPAK kanë raportuar gjatë dy ditëve të fundit se pranë këtyre institucioneve janë depozituar mbi 170 kallëzime dhe referime për krime zgjedhore. Sipas njoftimit të SPAK, deri të enjten më 8 maj janë administruar 123 materiale kallëzuese, ku në 35 raste është vendosur regjistrimi i procedimit penal. Për 22 denoncime është vendosur mosfillimi i hetimit penal, ndërsa 16 materiale kallëzuese u janë kaluar për kompetencë lëndore prokurorive të juridiksionit të përgjithshëm. Ndërkohë, janë dërguar për verifikim të mnëtejshëm në polici 10 materiale kallëzuese.
Nga 35 çështjet për të cilat është filluar hetimi nga Struktura e Posaçme, 29 procedime janë regjistruar për veprën penale “Korrupsioni aktiv në zgjedhje”; 4 procedime janë regjistruar për korrupsion aktiv dhe pasiv në zgjedhje; për veprën penale “Përdorimi i funksionit publik për qëllime politike është regjistruar një çështje penale dhe për qëllime politike dhe një tjetër çështje është regjistruar po për këtë vepër penale, si dhe për shpërdorim detyre.
Ndërkohë, sipas Prokurorisë së Përgjithsme, në prokuroritë e juridiksionit të përgjitshëm janë regjistruar gjithsej 54 kallëzime penale, të mbërritra nga Policia e Shtetit, nga SPAK, nga subjektet politike e nga qytetarët, si dhe të filluara kryesisht. Nga këto kallëzime janë regjistruar gjithsej 23 procedime penale. Pesë hetime kanë filluar në Prokurorinë e Fierit, nga të cilat dy për veprën penale “Pengimi i subjekteve zgjedhore”, një procedim për “Korrupsioni aktiv në zgjedhje” dhe dy për veprën penale “Përdorimi i funksionit publik për veprimtari politike ose zgjedhore”. Në Prokurorinë e Gjirokastrës janë regjistruar dy procedime penale për veprat penale “Falsifikimi i materialit zgjedhor dhe rezultateve të zgjedhjeve” e “Kanosja apo dhunimi ndaj pjesëmarrësve në zgjedhje”. Katër procedimet e regjistruara në Elbasan janë për veprat penale “Përdorimi i funksionit publik për veprimtari politike ose zgjedhore”, “Shpërdorimi i detyrës”, “Shpërdorimi i autoritetit policor”, “Përvetësimi i parave ose mallrave që rrjedhin nga vepra penale oseveprimtaria kriminale” dhe “Vjedhje”. Në Durrës është regjistruar një procedim për “Shpërdorimi detyre” dhe “Korrupsioni pasiv në zgjedhje”; në Dibër dy procedime për veprat penale “Përdorimi i funksionit publik për veprimtari politike ose zgjedhore” dhe “Goditijet për shkak të detyrës”; në Shkodër dy procedime për “Korrupsion pasiv në zgjedhje” dhe “Përdorimi i funksionit publik për veprimtari politike ose zgjedhore”; në Sarandë dy procedime për veprat penale “Pengimi i subjekteve zgjedhore” dhe “Dëmtimi me dashje i materialit zgjedhor”; në Prokurorinë e Kukësit, të Korçës dhe Vlorës nga një procedim penal në secilën për veprën penale “Përdorimi i funksionit publik për veprimtari politike ose zgjedhore”; si dhe dy procedime në Prokurorinë e Lezhës për veprat penale “Shkelja e fshehtësisë së votimit”, “Kanosja apo dhunimi ndaj pjesëmarrësve në zgjedhje” e “Mbajtja pa leje dhe prodhimi i armëve, armëve shpërthyese dhe i municionit”.
Për 10 prej kallëzimeve është vendosur mosfillimi i hetimit, ndërkohë që për një prej procedimeve të regjistruara në Dibër është dërguar çështja për gjykim ndaj një të pandehuri, ndaj të cilit nuk është kërkuar caktimi i ndonjë mase sigurimi personal. Një tjetër procedim i regjistruar në Prokurorinë e Gjorikastrës, është dërguar në gjykatë për pushim.
