Sipas banorëve, vendimi për pushimin e hetimeve është absurd, pasi koncesioni ka probleme të shumta ligjore që duhej të ishin hetuar. “Kemi pritur 6 vite dhe asnjë hetim nuk është bërë. Madje Prokuroria ka zhdukur edhe shumë dokumente që ne, si komunitet, i kemi vënë në dispozicion,” tha Tonin Beqiri, banor i Kaçinarit.
Ai shtoi se vetëm dy persona, banorë të zonës, rezultojnë në letra si mbështetës të ndërtimit të HEC-eve, por sipas tij, të dy këta firmëtarë, edhe pse me origjinë nga zona, nuk jetojnë fare në Shqipëri. “Është absurditet që institucionet janë bërë palë me këtë paligjshmëri, por ne nuk na ka mbetur gjë tjetër veçse të bëjmë vetëgjyqësi,” tha Beqiri.
Një tjetër protestues u ankua se kompania, me mbështetjen e Policisë së Shtetit, po ushtron presion në zonë për të detyruar banorët të tërhiqen. “Përveç punimeve që kanë nisur prej disa kohësh, ata po ushtrojnë edhe terror në zonë, me mbështetje të Policisë së Shtetit. Ju bëj thirrje të heqin dorë nga Kaçinari, pasi nuk do lejojmë zbatimin e këtyre projekteve,” tha banori.
Në të njëjtën linjë ishte edhe avokati i banorëve, Marash Logu, i cili deklaroi se koncesioni është i mbushur me shkelje dhe duhej hetuar me përparësi nga organet kompetente. “Këto projekte kanë ndikim shumë negativ në zonën e Kaçinarit dhe ky koncesion ka probleme të shumta ligjore,” tha Logu.
Ai shtoi se Prokuroria duhet të kishte hetuar, pasi edhe gjykata i ka caktuar dy herë detyra për të vepruar, por asgjë nuk është bërë.
“Është absurditet që kjo çështje të pushohet, në një kohë kur janë konsumuar vepra penale nga institucionet e shtetit dhe individë të tjerë,” tha ai.
Prokuroria njoftoi të mërkurën pushimin e hetimeve. Në njoftim thuhet se hetimet kishin nisur pas kallëzimit të banorëve të zonës, të cilët pretendonin se në këtë proces kishte elementë të veprave penale të “Shpërdorimit të detyrës” dhe “Falsifikimit të dokumenteve”, por pas një shqyrtimi të plotë të dokumentacionit ligjor dhe teknik, nuk janë konstatuar shkelje të ligjit dhe procedurat janë ndjekur në përputhje me rregulloret përkatëse.
Ndërkohë, mësohet se kompania koncesionare “Shpërdhaza Energji” ka depozituar një kallëzim penal në Prokurori dhe një padi civile në gjykatë ndaj dy individëve, të cilët i konsideron si organizatorët kryesorë të fushatës kundër projektit. Këta persona akuzohen nga kompania për shpifje dhe përhapje të informacionit të rremë me qëllim deformimin e opinionit publik dhe pengimin e një projekti të ligjshëm, të miratuar nga institucionet përkatëse.
Koncesioni për ndërtimin e 4 HEC-eve të vogla në zonën e Kaçinarit në Mirditë është dhënë në vitin 2018 dhe, pas rinovimit të lejeve, kompania “Shpërdhaza Energji” ka nisur punimet në terren për zbatimin e projekteve, sipas planit dhe në përputhje me lejet dhe miratimet ligjore.
