Në një postim publik në faqen zyrtare në Facebook, organizata që merret me mbrojtjen e të drejtave të njeriut ka shprehur mbështetjen për të drejtat e punëtorëve emigrantë në Shqipëri, pas publikimit të një artikulli nga BIRN Albania që dokumentonte shfrytëzimin e disa punëtoreve filipinase nga pronarët e një kompleksi turistik në bregdet.
“Kontrata të dyfishta dhe të parealizuara, orare të tejzgjatura, bllokim pasaportash dhe kërcënime për deportim” – kështu e përshkruajnë ekspertët e organizatës situatën e punëtorëve emigrantë të ardhur në Shqipëri përmes kontratave të punësimit.
“Drejtësi Sociale” thekson se në Shqipëri të drejtat e punëtorëve shpeshherë shkelen dhe nëpërkëmben, çka përbën një ndër arsyet kryesore përse qytetarët shqiptarë largohen nga vendi, duke sjellë kështu mungesë të fuqisë punëtore në tregun vendas.
Sipas organizatës, vetëm gjatë vitit të fundit kanë ardhur në Shqipëri rreth 15 mijë punëtorë të huaj me kontrata të përkohshme pune, të cilët janë përballur me kushte pune krejt të ndryshme nga ato të parashikuara në kontratë.
Një investigim i BIRN Albania zbuloi se kontratat e punës me punëtorët e huaj jo vetëm që nuk respektohen, por në disa raste, vetë pronarët e bizneseve që i rekrutojnë tentojnë t’i dëbojnë ata në mënyrë të paligjshme, kur ata ankohen për kushtet e punës apo kërkojnë të ndërpresin marrëdhënien e punësimit.
“Në një vend ku mungon respektimi i të drejtave të punëtorëve, ku sindikatat janë të pafuqishme dhe vëmendja politike për çështjet e punës është minimale, do të përballemi shumë shpejt me një krizë të thellë në lidhje me të drejtat e emigrantëve të punësuar në Shqipëri”, thuhet në reagimin e “Drejtësi Sociale”.
