Vendimi erdhi pas një përplasjeje ligjore të zgjatur për interpretimin e mënyrës së shpërndarjes së mandatit mes kandidatëve të listës së mbyllur dhe atyre të listës së hapur.
Në nisje të mbledhjes, përfaqësuesja ligjore e koalicionit, Dorina Prethi, kërkoi që Komisioni Qendror i Zgjedhjeve të njohë dorëheqjet e kandidatëve të listës së mbyllur dhe t’ia kalojë mandatin kandidatit më të votuar nga lista e hapur – në këtë rast Adriatik Lapajt. Ajo argumentoi se kërkesat për dorëheqje janë miratuar “në heshtje” nga KQZ-ja, pasi institucioni nuk ka marrë vendim brenda afatit 60-ditor të përcaktuar në Kushtetutë.
“Nëse KQZ nuk reagon brenda afatit ligjor, dorëheqjet konsiderohen të pranuara në heshtje,” tha Prethi, duke i bërë thirrje Celibashit që të shpërndajë mandatin sipas renditjes në listën e hapur.
Por Kryekomisioneri rrëzoi këto pretendime, duke theksuar se listat e mbyllura konsiderohen përfundimtare pas miratimit të tyre dhe nuk mund të ndryshohen. Ai shtoi se një listë kandidatësh është e pavlefshme nëse nuk ka numrin e plotë të emrave dhe se dorëheqjet nuk mund të pranohen automatikisht pa vendim të KQZ-së.
“Pretendimi se dorëheqjet janë miratuar në heshtje nuk qëndron. Pas miratimit të listës, procesi konsiderohet i përfunduar dhe nuk mund të rikthehet për rishqyrtim,” deklaroi Celibashi.
Ai sqaroi gjithashtu se, nëse një kandidat nuk pranon mandatin pas shpalljes së rezultatit, tërheqja duhet të bëhet përpara Kuvendit dhe jo pranë KQZ-së.
Në lidhje me dy kandidatë të listës së mbyllur, Zeqir Kordhoni dhe Kleana Xhuveli, të cilët fillimisht kishin paraqitur dorëheqje, Celibashi tha se ata kanë të drejtë të ndryshojnë mendim deri në momentin që KQZ nuk ka marrë një vendim për shpërndarjen e mandateve.
“Duke qenë se Kleana Xhuveli është renditur më lart në listë dhe ka deklaruar se dëshiron të marrë mandatin, ajo e përfiton atë,” tha Celibashi.
Xhuveli, e pranishme në mbledhje, pranoi për mediat se nuk ka pasur aspirata për t’u bërë deputete, por shtoi se vendimi i Celibashit nuk do të mbyllë betejën ligjore të koalicionit.
“Nisma Shqipëria Bëhet” paralajmëroi se do ta apelojë vendimin në Komisionin e Ankesave dhe Sanksioneve si dhe në Kolegj Zgjedhor, me synimin që mandati t’i kalojë liderit të saj, Adriatik Lapaj.
