Deputetët socialistë nuk morën parasysh kërkesat dhe protestën e opozitës që propozimet të shqyrtoheshin në mënyrë të rregullt duke i dhënë mundësinë asaj që të bënte amendime.
Ndryshimet në arkitekturën e re parlamentare u njoftuan publikisht nga kryeministri Edi Rama në një mbledhje të asamblesë së partisë dhe u zyrtarizuan të hënën si propozim ligjor në Kuvend.
Projektvendimi i hartuar nga socialistët parashikon shkrirjen e Komisionit të Integrimit të drejtuar nga opozita, ndërsa shton numrin e tyre nga 8 në 11 nga të cilët vetëm 4 do të drejtojë opozita, u miratua pa kaluar 24 orë duke mos kaluar rrugën e zakonshme të shqyrtimit në Këshillin e Mandateve dhe Rregullores.
Deputetët e opozitës braktisën procesin e votimit me akuzat për shkelje të rëndë të Kushtetutës, ndërsa socialistët e justifikuan nxitimin e tyre me argumentin se nisja e jetës parlamentare nuk mund të priste shqyrtimin e propozimeve.
“Propozimi i njëanshëm dhe pa gjithëpërfshirje, të cilin kanë vendosur ta kalojnë brenda 24 orëve në shkelje të procedurës së parashikuar nga rregullorja dhe Kushtetuta”- tha kryetari i grupit parlamentar të Partisë Demokratike Gazment Bardhi pasi deputetët e saj nuk morën pjesë në votim.
Ndërsa homologu i tij socialist Taulant Balla e konsideroi kundërshtimin e opozitës si një ‘teatër’ për “të mos rënë dakord”.
“Këtu nuk ka shkelje, jemi në një fazë që parashikohet faza e konstituimit (Kuvendit)” – tha ai duke argumentuar procedurën e përshpejtuar, ndërsa riformatimin e komisioneve me nevojën për t’iu përshtatur procesit të integrimit në BE.
