Ish-drejtori i Parkut Kombëtar Divjakë- Karavasta është nderuar me çmim nga organizata mjedisore gjermane, Euronatur, për përpjekjet e tij të zellshme për mbrojtjen e këtij parku me koston e humbjes së vendit të punës dhe krijimit të shumë armiqve në Shqipëri.
“Në rolin e tij si drejtor i parkut kombëtar Divjakë-Karavasta, Ardian Koçi ka treguar një shembull në përfshirjen e tij me qëllimet e ruajtjes së këtij parku, duke pranuar kosto profesionale dhe personale në mbrojtje të integritetit të tij,” deklaroi drejtori ekzekutiv i EuroNatur, Gabriel Schwaderer.
Përballë planeve të ndërtimeve dhe turizmit masiv në Shqipëri, të cilat rrezikojnë burimet dhe trashëgimitë natyrore të vendit, Koçi u detyrua të jepte dorëheqjen nga posti i drejtorit, pasi ai kundërshtoi këto projekte që preknin kufinjtë e parkut kombëtar në Divjakë.
Ndryshimet ligjore në muajin Shkurt 2024 përsa i përket mbrojtes së Zonave të Mbrojtura i hapën rrugën projekteve kontroverse të cilat synojnë turizmin masiv në dëm të peizazheve të mbrojtura apo parqeve kombëtare.
Koçi u përpoq prej vitesh për të mbrojtur parkun e Divjakë- Karavastasë, i njohur për praninë e pelikanëve Dalmatian, një specie e rrezikuar.
“Duam të nderojmë këtë dedikim të madh të tij duke i dhënë çmimin EuroNatur”, u shpreh Schwaderer. Sipas organizatës gjermane EuroNatur, Koçi do ta marrë çmimin më 16 Tetor 2025.
