Prokuroria e Tiranës njoftoi të shtunën, më 27 shtator, përfundimin e hetimeve dhe dërgimin për gjykim të ish-drejtoreshës së Agjencisë Shtetërore të Kadastrës, ASHK Tiranë, Elira Gogo, pasi akuzohet se ka favorizuar ndërtimet jashtë lejeve, duke i shkaktuar shtetit dëme me vlera miliona lekë. Ndaj Gogos rëndojnë akuzat për veprat penale “Falsifikim i dokumenteve” dhe “Shpërdorim detyre”. Po ashtu, është marrë i pandehur edhe shtetasi Sh. B., i akuzuar për “Ndërtim të paligjshëm” dhe “Mashtrim”.
Në njoftim sqarohet se nga hetimet ka rezultuar se në rrugën e “Bogdanëve” ka pasur ndërtime me ndryshim destinacioni në kundërshtim me lejen e dhënë. Sipërfaqja e ndërtuar jashtë lejes, e përcaktuar nga akt-ekspertimi teknik, është 2 240 m². Për këtë sipërfaqe, taksa e ndikimit në infrastrukturë është llogaritur në shumën 24 milionë e 998 mijë lekë, shumë më e lartë se ajo e paguar në bazë të dokumenteve të falsifikuara.
“Nga hetimet rezultoi se veprimet e shtetases E. G., në cilësinë e Drejtoreshës së ASHK-së Tiranë Veri, janë përpiluar dhe nënshkruar dokumente pa kryer matje në terren, duke u raportuar sipërfaqe shumë më të vogla nga ato reale. Këto veprime kanë sjellë përfitim të padrejtë për subjektin ndërtues dhe dëm të interesit publik”, citohet në njoftim.
Prokuroria pretendon se është provuar që Gogo, pa bërë matje në terren, ka urdhëruar pagesën e taksës së infrastrukturës dhe sipas saj, sipërfaqja totale e objektit shtesë që do të legalizohej është 80.5 m². Ndërsa sipas aktit të ekspertimit, sipërfaqja e ndërtuar jashtë lejes së ndërtimit është 2 240 m².
Në gjashtë muajt e fundit, Policia e Shtetit ka konstatuar mijëra raste të ndërtimeve të paligjshme dhe pushtimit të tokës, por zyrtarët e proceduar për shpërdorim detyre numërohen me gishtat e dorës. Të dhënat, sipas juristëve, tregojnë mungesën e seriozitetit në zbatimin e ligjit.
