Gjykata Administrative në Tiranë vendosi të hënën nxjerrjen jashtë juridiksionit gjyqësor të kërkesës së ish-kryetares së KLGJ-së, Naureda Llagami për shqyrtimin e kërkesës për sigurim padie me objekt pezullimin e zbatimit të vendimit të Mbledhjes së Posaçme të Gjyqtarëve të Gjykatës së Lartë, që përzgjodhi si fitues për vakancën në Gjykatën Kushtetuese gjyqtarin Asim Vokshi.
Megjithëse Vokshi u rendit i pari në pikëzimin e kryer nga Këshilli Emërimeve në Drejtësi, KED, me një diferencë të papërfillshme me Llagamin që u rendit e dyta, kjo e fundit arriti të sigurojë 8 vota në Mbledhjen e Posaçme të Gjyqtarëve të Gjykatës së Lartë. Vokshi u votua nga 6 anëtarë të Gjykatës së Lartë, ndërsa një votë u cilësua e pavlefshme. Me arsyetimin se asnjë prej kandidatëve nuk arriti të sigurojë 3/5-at e votave, u vendos që fitues të shpallet Vokshi, bazuar në renditjen e KED.
Llagami ngriti pretendime për votën e pavlefshme dhe pasi kërkoi gjithë aktet e procedurës së votimit dhe numërimit të votave në Gjykatën e Lartë, i’u drejtua Gjykatës Administrative të Shkallës së Parë me kërkesë për pezullimin e zbatimit të vendimit që shpalli fitues Vokshin.
Gjatë një bisede telefonike të mëparshme më 7 tetor, Llagami i tha BIRN se në fletën e votimit që u shpall e pavlefshme shprehej qartë vullneti në favor të saj, ndaj nuk kishte arsye për të mos u konsideruar. Llagami e cilësoi si deformim të vullnetit të votës deklarimin e pavlefshëm të fletës së votimit, ose më e pakta si një vullnet të palexuar.
Gjykata Administrative njoftoi të hënën se gjyqtarja Semiramis Hoxholli ka vendosur nxjerrjen e çështjes së paraqitur nga Llagami jashtë juridiksionit gjyqësor të saj dhe si pasojë, mospranimin për shqyrtim të kërkesës për sigurim padie.
Në dispozitivin e shpallur të hënën, përcaktohet se kundër këtij vendimi bëhet ankim i veçantë në Kolegjin Administrativ të Gjykatës së Lartë brenda 5 ditëve. Nëse do të ushtrohet ankim, është Gjykata e Lartë që do të përcaktojë se cila është gjykata kompetente për shqyrtimin e kërkimit të Llagamit.
Ish-kryetarja e KLGJ-së, Naureda Llagami pohoi për BIRN se është në pritje për të lexuar vendimin e arsyetuar për të proceduar me ankimin.
Ankimi i Llagamit ka sjellë ndërkohë vonesa për dekretimin e gjyqtarit Asim Vokshi në Gjykatën Kushtetuese. E pyetur nga BIRN, këshilltarja për mediat në Presidencë, Arta Sakja tha se do të kishte njoftim sapo “çështja të hyjë në axhendë”.
