Prokuroria e Posaçme kundër Korrupsionit dhe Krimit të Organizuar, SPAK njoftoi të hënën më 13 tetor përfundimin e hetimeve dhe dërgimin për gjykim të çështjes penale në ngarkim të 11 të pandehurve për kontrabandaim të 200 tonëve naftë përmes një anije tuniziane në muajin janar. Sipas njoftimit të SPAK, i pandehuri Juxhin Koka akuzohet se në bashkëpunim me kapitentin e anijes me flamur tunizian, “Aya Zanoybya”, Mohammad Sallit, oficerin e parë të anijes, Nedio Mejdani, si dhe katër marinarët Hasan Broud, Sami Shanata, Faez Ismaeil e Wissam Rostom, kanë planifikuar dhe realizuar kontrabandimin e 200 tonëve naftë që gjendej në anijen e ankoruar në Porto Romano të Durrësit, më datë 7 janar të këtij viti.
Anija “Aya Zanoybya” dhe nafta e kontrabanduar janë sekuestruar nga policia e Durrësit me 12 janar. Nga hetimet ka rezultuar se të pandehurit Juxhin Koka dhe Drilon Malluta, i kanë ofruar shumën 10 mijë euro punonjësit të policisë Armand Marvataj, i cili ishte në shërbim për ruajtjen e anijes së sekuestruar, me qëllim që të lejonte nxjerrjen e sasisë së naftës. Vjedhja e naftës është realizuar mbrëmjen e 27 janarit, në bashkëpunim me ekuipazhin e anijes, inxhinierin dhe përgjegjësin teknik, Samir Bayoumy dhe marinarët, Hasan Broud, Sami Shanata, Faez Ismaeil, Wissam Rostom e Abdoulmohaimen Shanata.
Shuma monetare prej 10 mijë eurosh është gjetur dhe sekuestruar në cilësinë e provës materiale gjatë kontrollit të banesës së punonjësit të policisë, Armand Marvataj, i cili akuzohet për korrupsion pasiv. Të pandehurit Drilon Malluta dhe Juxhin Koka akuzohen për korrupsion aktiv. Koka akuzohet dhe për kontrabandë të naftës, së bashku me shtetasit sirianë. Katër prej tyre, marinarë të anijes, si dhe egjiptiani Samir Bayoumy, me detyrë inxhinier, akuzohen dhe për vjedhje të kryer në bashkëpunim.
Në një investigim të mëparshëm, BIRN analizoi kthimin e Shqipërisë gjatë dekadës së fundit në një pikë kalimi për naftën që vjen nga vende nën embargo nga OKB-ja si dhe nga shtete të Lindjes së Mesme si Libia apo Tunizia.
