Prokuroria e Posaçme kundër Korrupsionit dhe Krimit të Organizuar (SPAK) njoftoi të enjten, më 16 tetor, përfundimin e hetimeve ndaj një polici të Policisë Bashkiake në Bashkinë Tiranë, i akuzuar se toleroi një ndërtim pa leje kundrejt marrjes së ryshfetit. SPAK ka dërguar për gjykim çështjen ndaj policit bashkiak Besmir Cani për korrupsion pasiv, pasi ai ka marrë përfitim të parregullt në shumën 2.4 milionë lekë.
Nga hetimet ka rezultuar se Cani nuk e ka raportuar ndërtimin pa leje, nuk ka vendosur gjobën përkatëse dhe e ka shmangur nga prishja objektin e ndërtuar pa leje nga i pandehuri tjetër, Ahmet Mashollari. Sipas SPAK, është provuar se Mashollari i ka dhënë shumën prej 2.4 milionë lekësh punonjësit të policisë bashkiake.
Në gjashtëmujorin e parë të këtij viti, Policia e Shtetit ka konstatuar mijëra raste të ndërtimeve të paligjshme dhe pushtimit të tokës, por zyrtarët e proceduar për shpërdorim detyre numërohen me gishtat e dorës.
