Gjykata e Lartë mbrojti përmes një deklarate të premten procesin e votimit që nxorri fitues gjyqtarin Asim Vokshi për një vend në Gjykatën Kushtetuese, ndërsa shtoi se po përballej me një sulm verbal të ngritur sipas saj mbi interpretime dhe pretendime “të pavërteta, të pasakta dhe të njëanshme”.
Gjykata e Lartë sqaroi gjithashtu rregulloren e procesit të votimit që kontestohet nga kandidatja tjetër për në Gjykatën Kushtetuese, Naureda Llagami. Sipas Gjykatës së Lartë, rregullat që u zbatuan në Mbledhjen e Gjyqtarëve “janë identike me ato të miratuara nga Këshilli i Lartë Gjyqësor, nën drejtimin e znj. Llagami”.
Reagimi vjen pas rrjedhjes në media të dokumenteve të procesit të votimit, bashkë me një kopje të votës së pavlefshme si dhe regjistrimet audio të mbledhjes. Në njoftim ngrihen dyshime se këto dokumente mund të jenë rrjedhur nga Llagami, pasi ajo është i vetmi subjekt që e ka kërkuar këtë dokumentacion.
Gjykata e Lartë dhe ish-kryetarja e KLGJ-së, Naureda Llagami ndodhen në një kurs përplasjeje për shkak të procesit të zgjedhjes së gjyqtarit pasues në vend të Holta Zaçajt në Gjykatën Kushtetuese.
Gjyqtari Asim Vokshi u shpall fitues i pozicionit vakant më 30 shtator, bazuar mbi pikëzimin e Këshillit të Emërimeve në Drejtësi, KED. Gjykata e Lartë bëri me dije atëherë se, nga votimi i fshehtë, kandidatja Naureda Llagami kishte siguruar 8 vota, Vokshi 6 vota, ndërsa një votë u shpall e pavlefshme. Me arsyetimin se asnjëri nuk arriti të sigurojë 3/5 e votave, u shpall fitues Vokshi, i cili në pikëzimin e KED kishte siguruar vendin e parë.
Llagami ngriti pretendime për votën e pavlefshme, me argumentin se vullneti i zgjedhësit ishte i qartë në favor të saj dhe iu drejtua Gjykatës Administrative me kërkesë për pezullimin e zbatimit të vendimit që shpalli fitues Vokshin. Kërkesa iu rrëzua, pasi nga gjykata u çmua se ishte jashtë juridiksionit gjyqësor të Gjykatës Administrative të Shkallës së Parë Tiranë.
Në vijim, Llagami ju drejtua Gjykatës Kushtetuese, duke kërkuar që t’i konsiderohet dhe vota e cilësuar si e pavlefshme dhe të shpallet fituese me 9 vota për vendin vakant të Zaçajt.
Gjykata e Lartë sqaroi se procedura e zgjedhjes së kandidatit fitues u bazua në legjislacion si dhe në një rregullore të Mbledhjes së Posaçme të Gjyqtarëve të Gjykatës së Lartë, të miratuar më 24 shkurt 2022. Po ashtu, sillet në vëmendje se kjo rregullore është zbatuar në mënyrë identike me procedurat e mëparshme, pa asnjë kontestim institucional.
Gjykata e Lartë shprehet se çdo proces votimi në organet e drejtësisë ka në themel parimin e fshehtësisë së votës, si një garanci e pavarësisë së vullnetit të gjyqtarëve dhe e integritetit të vendimarrjes kolegjiale. Ky parim cilësohet si një garanci substanciale që siguron që asnjë gjyqtar të mos ndjehet i ekspozuar, i identifikueshëm apo i ndikuar nga mënyra si voton.
Në reagim sqarohet se rastin konkret, në fletën e shpallur të pavlefshme janë bërë dy shenja të ndryshme: një kryq votimi dhe një rrethim i numrit në krah të kandidatit. Sipas Gjykatës së Lartë, pavarësisht se kjo gjë mund të japë përshtypjen e një “qartësie të vullnetit”, ajo cënon hapur fshehtësinë e votës dhe hap mundësinë që ajo të mund identifikohet.
“Nëse lejohet që çdo votë ‘e qartë’ të pranohet edhe kur nuk është ‘e fshehtë’, atëherë parimi i fshehtësisë humbet kuptimin dhe procesi bëhet i identifikueshëm”, argumenton Gjykata e Lartë.
Ndërkohë, cilësohet e pasaktë referenca ndaj Kodit Zgjedhor për procesin zgjedhor të këtij lloji, me argumentin se zgjedhja e anëtarit të Gjykatës Kushtetuese nga Gjykata e Lartë nuk është proces zgjedhor politik, por procedurë institucionale e brendshme, e rregulluar nga dispozita të posaçme ligjore.
“Në votimin institucional, si në rastin e zgjedhjeve të brendshme të gjyqtarëve për organet e qeverisjes së drejtësisë, votues janë vetë gjyqtarët, dhe thelbi i procesit është garantimi i pavarësisë, fshehtësisë dhe integritetit profesional të votës”, argumenton Gjykata e Lartë dhe shton se prandaj, rregullorja e Mbledhjes së Posaçme, ashtu si edhe dispozitat të veçanta ligjore ndalon çdo shënim shtesë mbi fletën e votimit, duke e konsideruar atë pavlefshme.
Gjykata e Lartë shpërndau dhe një kopje të fletës së votimit të përdorur në votimin e 30 shtatorit, në fund të së cilës shënohet ndër të tjera se, në fletën e votimit nuk mund të bëhen shënime të tjera përveç shenjës së votimit, pasi çdo shënim tjetër e bënë votën të pavlefshme.
Ish-kryetarja e KLGJ-së, Naureda Llagami, nuk preferoi të jepte ndonjë koment apo qëndrim lidhur me reagimin dhe sqarimet e dhëna prej Gjykatës së Lartë. “Unë nuk mund të bëj komente pasi çështja është në gjykim,” tha Llagami.
Gjykata e Lartë deklaroi gjithashtu se ka vepruar me transparencë të plotë dhe pa asnjë rezervë gjatë gjithë procesit, duke i vënë në dispozicion menjëherë znj. Llagami, çdo dokument të kërkuar prej saj, përfshirë procesverbalin e mbledhjes, regjistrimin audio dhe dokumentet shoqëruese. Duke sjellë në vëmendje se këto dokumente janë tashmë të njohura publikisht, Gjykata e Lartë vlerëson se ky fakt dëshmon se nuk ka pasur asnjë synim për t’i mbajtur ato të fshehta, apo për të kufizuar informimin.
“Institucioni i Gjykatës së Lartë nuk trembet nga sulmet, as ndikohet prej tyre. Gjuha e denigrimit dhe e përbaltjes nuk mund të zëvendësojë ligjin, logjikën dhe përgjegjësinë që mbart çdo gjyqtar,” thuhet në njoftimin e gjykatës.
