Mbrëmjen e kaluar, në fasadën e ish-hotelit “Vollga”, janë ekspozuar rreth 120 foto të skanuara, që i përkasin kryesisht pamjeve të qytetit bregdetar gjatë shekullit të kaluar.
Fotoja më e hershme, e shkrepur në vitin 1912, dëshmon një pjesë të mureve antike pranë Torrës veneciane, të cilat nuk ekzistojnë më.
Paraditen e sotme, 20 tabelat me foto kanë tërhequr interesin e qytetarëve vendas, si dhe të turistëve të huaj që vizitojnë Durrësin gjatë sezonit të vjeshtës.
Ndërkaq, edhe pse me vonesë, punonjësit e ndërmarrjes komunale kanë filluar të shtrojnë trotuarin ngjitur me ish-hotelin, që u shërben më së shumti kalimtarëve drejt shëtitores bregdetare.
Qytetarët shpresojnë që fotot dhe trotuari të ndriçohen në orët e mbrëmjes, në mënyrë që të jenë tërheqëse për vizitorët e interesuar.
Kujtesa e qytetit ka pësuar humbje të mëdha gjatë tre dekadave të fundit, kur një pjesë e objekteve me vlerë janë rindërtuar dhe kanë humbur destinacionin fillestar.
Një pjesë e fotove në ekspozitë tregojnë pamjet e fabrikës së cigareve “Stamles”, që është kthyer në një institucion arsimor, pa ruajtur qoftë edhe një shenjë nga aktiviteti gati 70-vjeçar i fabrikës së njohur në shkallë ballkanike.
Fotot që mungojnë më shumë në tabelat e përgatitura janë ato të shatërvanit që u hoq nga sheshi “Liria”, për t’i lënë vend projektit të ri të sheshit në mesin e viteve 2010.
Shatërvani ishte vepër e arkitektit Kristo Sotiri, 80 vjet më parë, dhe i përkiste kohës së ndërtimit të godinës së Bashkisë.
Pamjet e ekspozuara të Durrësit gjatë dekadave të kaluara dëshmojnë gjithashtu edhe foto nga shkolla e parë në qytet, në territorin e së cilës sot nuk ka asnjë shenjë apo tabelë përkujtimore.
Fotot e paraqitura në ekspozitën e hapur përballë Torrës veneciane janë ofruar në pjesën më të madhe nga pedagogia e UAMD-së, Brunilda Liçaj, e cila i ka qëmtuar ato në vëllime të shumta të kohës, përfshirë edhe revistën “National Geographic”.
