Këshilli i Lartë i Prokurorisë, KLP vendosi të hënën më 20 tetor miratimin e listës së katër kandidatëve në procedurën e përzgjedhjes së drejtuesit të ri të Prokurorisë së Posaçme, SPAK.
Sipas relatorit të çështjes, Sokol Stojani, nga verifikimet e kryera ka rrezultuar se prokurorët Adnan Xholi, Doloreza Musabelliu, Elvin Gokaj dhe Klodian Braho i plotësojnë kushtet ligjore për vijimin e garës.
Drejtuesit aktual të SPAK, prokurorit Altin Dumani i përfundon mandati 3-vjeçar më 18 dhjetor. Stojani vërejti se procedura për përzgjedhjen e drejtuesit të ri është filluar dhe po vijon sipas përcaktimeve ligjore.
Prokurori Adnan Xholi ka një karrierë 28 vjeçare në radhët e organit të akuzës dhe mban aktualisht pozicionin e shefit të seksionit kundër krimit të organizuar dhe terrorizmit në SPAK. Xholi ka punuar më parë pranë Prokurorisë së Përgjithshme dhe asaj të Krimeve të Rënda. Xholi kandidoi për të qenë drejtues i SPAK edhe tre vjet më parë, kur në këtë pozicion u përzgjodh Dumani.
Kandidatja Doloreza Musabelliu ka kryer Shkollën e Magjistraturës në vitet 2002-2005 dhe është emëruar më pas prokurore në Prokurorinë e Krimeve të Rënda. Ajo e ushtroi funksionin në këtë prokurori prej 14 vitesh dhe vijoi punën si prokurore e SPAK që prej themelimit të këtij institucioni.
Prokurori Elvin Gokaj e ka nisur karrierën në sistemin e drejtësisë si oficer i policisë gjyqësore. Në vitin 2000 ai u emërua prokuror në Prokurorinë e Matit, ndërsa në vitet 2007-2013 ka kryer detyrën e drejtuesit të Prokurorisë së Elbasanit, si dhe në Prokurorinë e Fierit. Prej vitit 2014, Gokaj punoi në Prokurorinë e Apelit të Shkodrës prej nga u emërua në SPAK.
Kandidati tjetër, prokurori Klodian Braho ka mbaruar Shkollën e Magjistraturës në vitet 2005-2008 dhe më pas është emëruar prokuror në Berat. Në vitin 2012, Braho u transferua në Prokurorinë e Vlorës ku mbajti edhe postin e zv.drejtuesit, ndërsa në vitin 2015 u dekretua në ish-Prokurorinë e Krimeve të Rënda dhe më pas vijoi në SPAK. Braho mban aktualisht pozicionin e shefit të seksionit kundër korrupsionit në SPAK.
Në fillim të seancës të hënën, anëtari i KLP-së, Zeqir Hoda bëri me dije se në media janë publikuar në fundjavë disa shkrime, të cilat sipas tij duhet të relatohen në Këshill për të konkluduar nëse ka konflikt interesi. Hoda deklaroi se vlerësonte se nuk gjendej në kushte të konflikt të interesit, megjithatë kërkoi që të vendoset nga Këshilli nëse ai do të jetë i pranishëm në vijimin e procedurës dhe votimit të përzgjedhjes së drejtuesit të ri të SPAK. Hoda tha gjithashtu se vlerësonte që duhej të largohej nga votimi i kësaj séance.
Anëtari Vatë Staka u shpreh se në kushtet kur prania ose mosprania e Hodës nuk sillte ndonjë pasojë, të largohej dhe çështja të diskutohej në seancën e ardhshme. I pyetur nga BIRN, Hoda tha se kishte kërkuar që Këshilli të trajtonte disa shkrime të cilat pretendonin se ai ishte në konflikt interesi, pasi njëri prej kandidatëve për kreun e SPAK ka qenë anëtar i Komisionit të Përzgjedhjes së hetuesve të Byrosë Kombëtare të Hetimit, që ka vlerësuar djalin e tij.
