Sipas vendimit, mandati i Bejtjes ka mbaruar që më datë 25 prill 2025 bazuar në një arsyetim të mëparshëm të kësaj gjykate, që gjatësia e mandatit nuk do të llogaritej nga data e betimit të gjyqtarit, por nga data e mbarimit të mandatit të gjyqtarit që e ka zëvendësuar.
Në këtë rast, Bejtja e ka marrë detyrën në vitin 2020, por gjyqtarit që ajo zëvendësoi, Sokol Berberit, i ka mbaruar mandati që në prill 2016.
“Referuar vendimit nr. 60, datë 16.10.2025 të Gjykatës, fillimi i mandatit kushtetues që ushtron gjyqtarja Sonila Bejtja përkon me datën e deklaruar nga Gjykata të mbarimit të mandatit të gjyqtarit që ajo ka zëvendësuar, pra të gjyqtarit Sokol Berberi,” arsyeton vendimi i gjykatës.
Vendimi i marrë të premten hyn në fuqi menjëherë dhe Gjykata Kushtetuese do të njoftojë Presidentin e Republikës si organi i emërtesës dhe Kuvendin për këtë vendim.
Anëtarët e kësaj gjykate nuk kanë qenë unanimë në vendimmarrje. Mendimi i pakicës që përfaqësohet nga kryetarja Holta Zaçaj dhe Genti Ibrahimi, argumenton se “kërkimi i Presidentit për deklarimin e mbarimit të mandatit të gjyqtares Sonila Bejtja është i pabazuar, ndaj duhej të ishte vendosur rrëzimi i tij”.
“Mandati në këtë rast nuk përkthehet thjesht si koha gjatë të cilës ushtrohet një detyrë e caktuar, pra si një detaj procedural, por ai lidhet drejtpërdrejt me garancitë dhe parimet kushtetuese, përfshirë ato të pavarësisë së Gjykatës dhe patundshmërisë në detyrë të gjyqtarit kushtetues,” thuhet ndër të tjera në argumentet e dy gjyqtarëve që kanë votuar kundër.
Sipas këtij argumentimi, garancia e kohëzgjatjes dhe paprekshmërisë së mandatit e mbron gjyqtarin nga ndikimet e forcave politike që mund të vijnë në pushtet.
Gjykata Kushtetuese u vendos në lëvizje nga kërkesa e Presidentit Bajram Begaj për të interpretuar mbi deklarimin e mbarimit të mandatit të anëtarëve të saj, me qëllim mundësimin e përtëritjes së pjesshme të trupës së Gjykatës Kushtetuese sipas dispozitave kushtetuese të vitit 2016, në kuadër të Reformës në Drejtësi.
Opozita e ka kundërshtuar këtë vendim si një tentativë të mazhorancës qeverisëse për të kapur Gjykatën Kushtetuese.
Aktualisht kjo gjykatë ka 2 vakanca, pas largimit me dorëheqje të gjyqtares Elsa Toska. Për vendin e Zaçajt është zgjedhur gjyqtari Asim Vokshi, por procedura e përzgjedhjes është kontestuar nga kandidatja tjetër në garë, Naureda Llagami.
