Drejtoria për Hetimin e Krimeve Kibernetike njoftoi të enjten se ka arrestuar një shtetas 29-vjeçar, banues në Tiranë, me akuzën e veprës penale “Pornografia me të mitur”.
“Pas informacioneve të ardhura nga autoritetet policore gjermane dhe nga EUROPOL-i, Drejtoria për Hetimin e Krimeve Kibernetike, në bashkëpunim me Drejtorinë e Forcës së Posaçme Operacionale, ka kryer veprimet hetimore dhe procedurale që çuan në identifikimin dhe arrestimin e shtetasit M. Z”, shkruan njoftimi zyrtar i Policisë së Shtetit.
Vepra penale e pornografisë me fëmijë përbën krim dhe dënohet me burgim nga tre deri në dhjetë vjet.
Policia e Shtetit i bën thirrje prindërve, mësuesve dhe kujdestarëve të fëmijëve të jenë vigjilentë për sjellje të dyshimta që mund të spikatin në mjediset e të miturve, dhe t’i denoncojnë ato pranë institucionit të saj.
“Drejtoria për Hetimin e Krimeve Kibernetike fton qytetarët, prindërit dhe të rinjtë që të raportojnë çdo rast të dyshuar të shpërndarjes, prodhimit apo konsumimit të materialeve me përmbajtje pornografike që përfshijnë të mitur, si dhe çdo formë tjetër të abuzimit seksual online”, thuhet në njoftimin e Policisë së Shtetit.
