Në Gjykatën e Posaçme të Shkallës së Parë për Korrupsionin dhe Krimin e Organizuar filloi të hënën më 17 nëntor gjykimi i çështjes penale në ngarkim të ish-zëvendëskryeministrit, Arben Ahmetaj, i cili akuzohet për “shpërdorim detyre” lidhur me privatizimin e një parcele toke me çmimet e vitit 1994 duke injoruar një vendim gjykate.
Gjykimi për Ahmetajn në këtë çështje po zhvillohet me procedurën e gjykimit të zakonshëm. Në fillim të seancës, kur gjyqtarja e çështjes, Irena Gjoka bëri apelin e palëve, vërejti se Ahmetaj nuk është paraqitur. Ndërkohë, ajo evidentoi se, sipas akteve që disponon gjykata, Ahmetaj gjendet në Zvicër, shtet drejt të cilit është dërguar një letër-porosi nga autoritetet shqiptare për ekstradimin e tij.
Prokurori i çështjes, Elvin Gokaj, lexoi para gjykatës kërkesën për gjykimin e Ahmetajt. Çështja penale lidhet me një parcelë toke me sipërfaqe 6370 metra në pronësinë e familjes Myderizi në rrugën 5 Maji në Tiranë, e cila sipas SPAK u privatizua duke përdorur çmimet e vitit 1994 në kundërshtim me një vendim gjykate të formës së prerë. “Thelbi i hetimit lidhet me një urdhër të kundërligjshëm të nënshkruar nga i pandehuri, me të cilin ka konsumuar veprën penale”, vërejti Gokaj. Ai kërkoi që në seancën e ardhshme të pyeten disa dëshmitarë.
Ahmetaj, i cili po gjykohet pa masë sigurie për këtë çështje, është në arrati për akuza të korrupsionit në lidhje me biznesmenët e inceneratorëve, Klodian Zoto dhe Mirel Mërtiri.
Përfaqësuesi ligjor i Ahmetajt, avokati Henrik Ligori kërkoi që nga ana e përfaqësuesit të SPAK të qartësohen rrethanat lidhur me një procedim të ndarë nga kjo çështje, duke u shprehur se nuk është e kuptueshme nëse do të sillen akte të reja në këtë gjykim nga ana e organit të akuzës.
Gokaj shpjegoi se, gjatë hetimit kishin rënë në dijeni të transferimit të një shume të madhe në drejtim të një vendi të Bashkimit Evropian. Por, sipas tij, deri tani nuk kanë akte apo të dhëna që përfshijnë Ahmetajn në këtë transaksion. Në vijim, prokurori Gokaj shpjegoi se janë duke u përkthyer aktet e mbërritura nga autoritetet austriake për këtë çështje.
Ligori konstatoi se kishin kërkuar që çështjet të bashkoheshin që të ishin të qarta akuzat. Ai solli në vëmendje se prokurori i bashkoi hetimet dhe më pas i ndau bazuar në sugjerimin e oficerit të policisë gjyqësore.
Ligori kërkoi që parashtrimet t’i paraqesë në seancën e radhës. Gjyqtarja Gjoka vendosi të shtyjë seancën për më datë 2 dhjetor, në orën 14:00, për t’i dhënë kohë mbrojtjes për parashtrimet dhe prokurorisë për të përkthyer aktet e mbërritura nga Austria.
Ahmetaj pati një karrierë të gjatë në Partinë Socialiste dhe shërbeu si ministër i Ekonomisë, i Financave, i Rindërtimit dhe si zëvendëskryeministër në qeverinë e drejtuar nga Edi Rama. Emri i tij u përfshi në hetimet për dhënien nga qeveria të 3 kontratave qindra-milionë euro për ndërtimin e inceneratorëve, një hetim që ka çuar pas hekurave disa zyrtarë të tjerë të lartë, një ish-ministër dhe një ish-deputet të PS-së.
Prokuroria e Posaçme, SPAK kërkoi arrestimin e tij dhe Kuvendi miratoi kërkesën më 14 korrik 2022, por Ahmetaj iu shmang përballjes me drejtësinë dhe ndodhet jashtë Shqipërisë. Një kontratë lobimi me vlerë 150 mijë dollarë e nënshkruar nga Ahmetaj zbuloi se ish-zëvendëskryeministri banon aktualisht në Lugano të Zvicrës, qytezë piktoreske e njohur si rezidencë për banka dhe për biznesmenë, në brigjet e liqenit me të njëjtin emër në kufi me Italinë.
