Gjykata e Posaçme e Shkallës së Parë për Korrupsionin dhe Krimin e Organizuar, SPAK vendosi të premten më 21 nëntor deklarimin fajtor të Gëzim Çelajt, i njohur si “Baroni i drogës”, bashkëpunëtorit të tij më të ngushtë, Arlind Ismajlukaj, si dhe të 11 anëtarëve të organizatës kriminale të drejtuar prej tyre. Trupi gjykues i përbërë nga Elsa Ulliri, Rudina Palloj dhe Erjon Bani deklaroi fajtor të pandehurin Gezim Çelaj për trafikim të narkotikëve dhe grup të strukturuar kriminal dhe e dënoi atë me 15 vjet burgim që në aplikim të gjykimit të shkurtuar prej nga ulet 1/3-ta, reduktohet në 10 vjet heqje lirie. I pandehuri Arlind Ismajlukaj u dënua me 14 vjet burgim që në aplikim të gjykimit të shkurtuar mbetet 9 vjet e 4 muaj burgim, ndërsa ndaj Nerim Çelës u caktua masa me 12 vjet e 6 muaj burgim dhe ai përfundimtar në aplikim të gjykimit të shkurtuar, me 8 vjet e 4 muaj burgim.
Po ashtu, u deklaruar fajtorë dhe anëtarët e tjerë të organizatës, Armando Mema, Dritan Metaj, Ben Dalipaj, Besnik Brokeri, Alekt Deda, Selami Lushkaj, Armando Papa, Ksenofon Bodo, Kyrylo Ponomarenko, Kostiantyn Biellon, të cilët u dënuan me nga 12 vjet burgim secili, që në aplikim të gjykimit të shkurtuar reduktohet në 8 vjet heqje lirie. I dënuari Dritan Metaj ka mbajtur pozicionin e shefit të Komisiariatit të Policisë Laç.
Të pandehurit u dënuan për veprat penale “Trafikimi i narkotikëve”, e kryer në bashkëpunim në kuadër të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Sipas SPAK, është provuar se të pandehurit si pjesë e grupit të strukturuar kriminal të drejtuar nga Gëzim Çelaj e Arlind Ismajlukaj, kanë marrë përsipër organizimin dhe trafikimin në sasi të mëdha të lëndëve narkotike, të paktën në dy raste, në ngjarjen e datës 31 Mars 2023, ku në rrugën nacionale Tiranë-Fushë Krujë është sekuestruar një sasi prej 41 kg lëndë narkotike e llojit heroinë, si dhe në ngjarjen e datës 14 Gusht 2023, ku është tentuar që nëpërmjet detit duke përdorur mjete lundruese të trafikohen sasi të mëdha të lëndëve narkotike, i njohur si operacioni policor ‘Flakë në det’.
Paralelisht me procedimin penal është filluar dhe hetimi pasuror prej nga me dy vendime të tetorit 2023 dhe marsit 2024, Gjykata e Posaçme e Shkallës së Parë ka vendosur sekuestrimin e një bar restorant në Laç dhe subjektin për ushtrimin e këtij aktiviteti; tre pasuri të paluajtshme me vlerë mbi 400 mijë euro; gjashtë automjete të markave të ndryshme; tre mjete lundruese tip Gomone; shumën monetare prej 102 mijë euro dhe afro 7 milionë lekë; si edhe një subjekt me gjithë asetet e tij që përbëhen nga pasuri të paluajtshme e luajtshme, llogari bankare, ku përfshihen 10 automjete.
