Gjykata e Posaçme e Shkallës së Parë për Korrupsionin dhe Krimin e Organizuar vendosi të premten më 21 nëntor deklarimin fajtor të 6 nga 11 të pandehurve të dërguar për gjykim si pjesë e një grupi të trafikut të narkotikëve e sigurim të kushteve për të kryer vrasje, pjesë e të cilit ishin dhe tre oficerë policie. Mes gjashtë të dënuarve të premten është një nga tre oficerët e policisë, Dedan Gjoni, i cili u gjet fajtor për sigurim të kushteve për të kryer vrasje, grup i strukturuar kriminal, trafikim të narkotikëve, e shpërdorim detyre. Gjykata e dënoi Gjonin me 12 vjet burgim, që në aplikim të gjykimit të shkurtuar mbetet 8 vjet. Me 8 vjet burgim u dënuan dhe të pandehurit Besim Murati e Albert Prenga, të akuzuar për trafikim të narkotikëve dhe grup i strukturuar kriminal.
I pandehuri Ismail Zeneli u deklarua fajtor për trafik të narkotikëve, grup të strukturuar kriminal dhe sigurim të kushteve e mjeteve për të kryer vrasje, në bashkëpunim dhe në aplikim të gjykimit të shkurtuar u dënua përfundimisht me 10 vjet heqje lirie. Bujar Ajeti Gremizi u gjet fajtor për sigurim të kushteve dhe mjeteve për të kryer vrasje, në bashkëpunim, grup i strukturuar kriminal, përkrahje të autorit të krimit dhe armëmbajtje pa leje. Gjykata vendosi dënimin e tij përfundimtar me 6 vjet burg. I pandehuri Ardjan Cenaj Dedja u dënua përfundimisht me 4 vjet burg për sigurim të kushteve për vrasje e grup të struktuar kriminal.
Organizata ku bëjnë pjesë të gjashtë të dënuarit akuzohet për përfshirje në trafikimin ndërkombëtar të narkotikëve, ku çdo anëtar ka role dhe detyra specifike, nga financimi dhe porositja, deri te transporti dhe shpërndarja e lëndëve narkotike.
Mes 11 të pandehurve për të cilët SPAK kërkoi gjykimin në tetor të vitit të kaluar, ishte dhe ish-funksionari i policisë, Erzen Breçani.
