Kolegji i Posaçëm i Apelimit, KPA, njoftoi të martën, më 16 dhjetor vendimin për shkarkimin nga detyra të subjektit të rivlerësimit Gëzim Çopa, duke pranuar kështu ankimin e bërë nga Komisioneri Publik.
Trupi gjykues i Kolegjit, i kryesuar nga Natasha Mulaj, me relatore Rezarta Schuetz dhe anëtarë Ina Rama, Mimoza Tasi e Sokol Çomo, arriti në përfundimin unanim për të ndryshuar vendimin e mëparshëm të Komisionit të Pavarur të Kualifikimit.
Gëzim Çopa ishte konfirmuar fillimisht në detyrë nga KPK më 22 shkurt 2024. Megjithatë, Komisioneri Publik e ankimoi këtë vendim në Kolegj, duke argumentuar se subjekti nuk plotësonte kushtet për të vazhduar detyrën. Edhe SPAK që zëvendësoi Komisionerin Publik i qëndroi ankimit duke kërkuar në Kolegj shkarkimin e Çopas nga detyra për mungesë burimesh e deklarim të pamjaftueshëm të pasurisë, si dhe për gjetjet në kriterin e figurës dhe profesionalizmit që në vlerësimin tërësor i konsideroi në cënim të besimit të publikut tek drejtësia.
Në përfundim të gjykimit të çështjes nr. 18/2024, trupi gjykues i KPA-së vlerësoi se ankimi ishte i bazuar.
“Trupi gjykues, bazuar në nenin 66, pika 1, shkronja “b” e ligjit nr. 84/2016… në mënyrë unanime, vendosi: Ndryshimin e vendimit nr. 738, datë 22.02.2024 të Komisionit të Pavarur të Kualifikimit dhe shkarkimin nga detyra të subjektit të rivlerësimit Gëzim Çopa,” thuhet në njoftimin zyrtar.
