Socialistët zbatuan qëndrimin publik të kryeministrit Edi Rama që njoftoi të dielën se shumica e tij parlamentare nuk ka ndërmend të vijojë procedurën e heqjes së imunitetit të deputetes Balluku, së paku deri më 22 janar, kur pritet vendimi Gjykatës Kushtetuese për çështjen tjetër, atë të masës së sigurisë së pezullimit nga detyra.
Anëtarët e opozitës në këtë Këshill u mblodhën në mënyrë të njëanshme në sallë dhe në një deklaratë për mediat akuzuan kryetarin e Kuvendit, Niko Peleshi se ka shkelur Kushtetutën dhe Rregulloren e Kuvendit duke refuzuar thirrjen e mbledhjes.
Kreu i grupit parlamentar të Partisë Demokratike, Gazmend Bardhi, tha se “5 anëtarët e mazhorancës po sillen si zëdhënës të një të pandehure, jo të interesit publik. Po mbrojnë Belinda Ballukun, e akuzuar për abuzime dhe veprime korruptive në procedura që kapin vlerën e mbi 1.1 miliardë eurove”.
Sipas tij, sjellja e socialistëve është akt i rëndë i pengimit të drejtësisë dhe se mazhoranca parlamentare vepron sipas urdhërave politikë të Ramës.
Këshilli u mblodh për këtë çështje të premten, por nuk arriti në asnjë vendimmarrje pasi socialistët kërkuan kohë deri në fund të janarit për t’u njohur me provat ndaj saj, pavarësisht kërkesës proceduriale të prokurorëve të SPAK se mjaftonin 3 deri në 5 ditë kohë për njohjen me provat.
Deputeti Ulsi Manja, anëtar i këtij këshilli, u tha mediave se nuk mori pjesë për shkak të angazhimeve të tij në zonën elektorale.
Rregullorja e Kuvendit ka parashikuar një afat dyjavor për përfundimin e kësaj procedure dhe kalimin për votim në seancën parlamentare të radhës pas mbledhjes së Këshillit të Mandateve, por PS po përpiqet të përdorë në favor të shtyrjes pushimet dimërore të Kuvendit dhe rinisjen e punimeve në sesionin e ri parlamentar në janar.
Në relacionin e bërë publik që shoqëron dosjen me provat ndaj Ballukut, Prokuroria e Posaçme argumenton se po kërkon arrestimin e saj, pasi ka prova që ajo ka kërcënuar një dëshmitare, vartëse të saj dhe se rrezikon prishjen e provave. SPAK thotë se Balluku është tashmë nën hetim edhe për koncesionin e rrugës Thumanë-Kashar, veç tenderëve të Unazës për vitin 2021 dhe atë të tunelit të Llogarasë.
Ndërkohë socialistët u mblodhën të martën në Këshillin për Etikën dhe vendosën me shumicën e votave të përjashtojnë 30 ditë nga punimet e parlamentit 6 deputetë të PD-së për sjellje të dhunshme në seancën e fundit plenare.
