Gjykata e Posaçme vendosi të mërkurën më 7 janar lirimin nga qelia të CEO-s së kompanisë Bankers, Hongping Xiao, i akuzuar për mashtrim me të ardhurat, pastrim të produkteve të veprës penale dhe shpërdorim detyre. Sipas vendimit të gjykatës, Xiao do të hetohet në masën e “arrestit në shtëpi”.
Në njoftimin e shpërndarë nga gjykata bëhet me dije se është pranuar kërkesa e Xiao për lehtësimin e masës së sigurisë dhe është vendosur lirimi i menjëhershëm i tij nga ambjentet e paraburgimit. Po ashtu, është urdhëruar që kërkuesi të mos largohet nga banesa ku jeton. Ndërkohë, është rrëzuar kërkesa e të hetuarit tjetër për këto afera, Lianyi Wang. Vendimi është marrë nga gjyqtari Erjon Çela.
Xiao u arrestua në fillim të korrikut, së bashku me drejtues të tjerë të kompanisë koncesionare të shfrytëzimit të rezervave të naftës në Patos- Marinzë. Prokuroria i akuzon ata për veprat penale: “Krijimi i skemave mashtruese lidhur me tatimin mbi vlerën e shtuar”, “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Shpërdorimi i detyrës” dhe “Moskryerja e detyrave nga organet tatimore”, të parashikuara nga nenet 144/a, 180/3, 287, 248, 181/a të Kodit Penal. Pas caktimit të masave të sigurimit personal, çështja i kaloi për kompetencë Prokurorisë së Posaçme, SPAK.
Sipas prokurorsë, të hetuarit i kanë shkaktuar Shqipërisë humbje në miliona euro duke përdorur mashtrimin me TVSH-në. Kompania premtoi bashkëpunim për hetimin, por pretendoi se Tatimet i kishin borxh 36 milionë dollarë në rimbursim TVSH-je.
Në muajin nëntor të vitit të kaluar, u lirua edhe ish-administratori i Bankers, Leonidha Çobo, ndaj të cilit u vendos po ashtu masa “arrest në shtëpi”.
Bankers Petroleum LTD mori me koncesion në vitin 2004 fushën naftëmbajtëse Patos-Marinzë, me rezervat më të mëdha të naftës në Europën kontinentale. Kompania me seli në Kanada iu shit një kompanie kineze në vitin 2016. Kjo nuk është hera e parë që Bankers përballet me akuza nga autoritetet shqiptare.
