Policia e Shtetit njoftoi se nëpërmjet operacionit policor “Insistimi” ka arrestuar një shtetas për përndjekje online ndaj një qytetareje, veprim që i ka shkaktuar asaj traumë psikologjike.
“I shkaktoi ankth dhe panik, një 37-vjeçareje, duke e përndjekur dhe kanosur në rrjete sociale, nëpërmjet disa llogarive false, arrestohet 28-vjeçari”, shkruan njoftimi i Policisë së Shtetit.
Përndjekja është një vepër penale e cila dënohet me burg nga gjashtë muaj deri në katër vjet, sipas Kodit Penal të Republikës së Shqipërisë.
Policia raporton gjithashtu se nga kontrollet në dy celularët e autorit, u gjetën të aktivizuara llogari false, në platformat “Instagram” dhe “TikTok”, nëpërmjet të cilave 28-vjeçari përndiqte dhe kanoste 37-vjeçaren.
“Materialet procedurale iu referuan Prokurorisë së Tiranës, për veprime të mëtejshme”, përfundon njoftimi zyrtar i policisë.
