Një hetim i filluar kryesisht nga Prokuroria e Durrësit disa vjet më parë lidhur me paligjshmëri të kryera në zyrën vendore të Agjencisë Shtetërore të Kadastrës, ASHK, zbuloi përvetësimin përmes falsifikimit e të paktën 30 mijë m2 tokë shtet në zona të lakmuara në bregdet. Prokuroria ka gjetur përgjegjës zyrtarë e ish-funksionarë të ASHK-së Durrës, si dhe persona të tjerë, për gjashtë raste të falsifikimit të pjesëve të regjistrave hipotekorë.
Një burim pranë Prokurorisë së Durrësit i tha BIRN të enjten se, janë sekuestruar 15 regjistra të ASHK-së Durrës, prej nga janë konstatuar falsifikime në gjashtë raste. Falsifikimet janë kryer duke hequr nga regjistrat fletët ku shënoheshin të dhënat për tokën në pronësi të shtetit, që janë zëvendësuar me fletë të tjera ku pasqyrohen si pronarë të ngastrave të tokës, individë që nuk kishin asnjë lidhje me pasuritë në fjalë. Më vonë, pronat janë tjetërsuar nga këta persona që janë bërë pronarë përmes falsifikimit të regjistrave hipotekorë.
Nga hetimet e deritanishme, mësohet se përmes falsifikimeve në gjashtë raste, janë përvetësuar të paktën rreth 30 mijë m2 në fshatin Kallm dhe zonën e ish-NB Frutore të Durrësit. Identifikimi i fletëve të falsifikuara në regjistra është mundësuar nga krahasimi me regjistrat e skanuar vite më parë, nga rezulton se në pjesë të ndryshme, ata aktualë nuk përputhen me origjinalët. Prokuroria po verifikon regjistrat e skuestruar për të evidentuar çdo falsifikim apo tjetërsim tjetër të paligjshëm të pronave të kryer ndër vite.
Bazuar në të dhënat e siguruara deri tanimë nga hetimi, prokurorët e çështjes, Mediana Metaj dhe Anton Pali kanë kërkuar në gjykatë caktimin e masave të sigurimit për 12 persona nën hetim, që janë pranuar prej gjyqtarit Xhevdet Lika. Ndaj sh-drejtori i ASHK-së Durrës, në kohën kur janë falsifikuar regjistrat kadastralë, Adrian Kona, është caktuar masa e sigurimit “arrest në burg”, për veprat penale “falsifikimi i dokumenteve” dhe “shpërdorimi i detyrës”. Për të njëjtat vepra penale është caktuar masa e sigurimit personal “arrest në burg” edhe ndaj nëpunësve të tjerë të këtij institucioni, Bledar Zerba e Rovin Zeqja. Ndërsa për zyrtarët e tjerë, Jonida Mergeja, Artur Çobani e Leandro Dervishi, të akuzuar për “shpërdorim detyre” është caktuar masa e sigurimit personal “detyrim paraqitje”.
Masa e sigurimit “arrest në burg” është caktuar edhe ndaj të hetuarit Ramazan Sheshi, për veprat penale të “mashtrimit”, “falsifikimit të dokumenteve” dhe “pastrimit të produkteve të veprës penale ose veprimtarisë kriminale”.
Pesë të hetuarit, Shaqir Sheshi, Viktor Mataj, Arianit Mataj e Besnik Xhafa, të akuzuar për “falsifikim dokumentesh” e “mashtrim” janë lënë në “arrest shtëpie”, ndërkohë që ndaj Fiqirete Xhafës, të akuzuar edhe për pastrim parash, ëstë caktuar “detyrim paraqitje”.
Një javë më parë, SPAK përmbylli hetimet ndaj Aleksandër Lahos, i njohur ndryshe si Rrumi, vëllait të tij, Vullnet Muça dhe gjashtë të pandehur të tjerë, të cilët akuzohen për krijimin e skeme masive falsifikimi të shtrirë ndër vite me tokat nga Shijaku deri te Kepi i Rodonit, të llogaritura në vlerën e 16 milionë eurove.
