Më 7 Korrik në mediat online dhe rrjetet sociale qarkulloi një video virale e tre vajzave, ky dy prej tyre dhunonin një tjetër të mitur.
Sipas Drejtorisë Vendore të Policisë Fier, ngjarja daton prej 8 Qershorit 2026, kur e dhunuara ka bërë edhe kallëzim ndaj vajzave që kanë abuzuar me të.
“Menjëherë pas kallëzimit të së miturës, strukturat e Drejtorisë Vendore të Policisë Fier kanë vlerësuar maksimalisht denoncimin dhe, në bashkëpunim me Prokurorinë, kanë kryer të gjitha veprimet procedurale dhe hetimore, në përputhje me parashikimet ligjore”, shkruan njoftimi i Policisë së Fierit.
“Në vijim të veprimeve hetimore, janë shoqëruar në ambientet e Komisariatit të Policisë shtetasja L. L., 19 vjeçe, si dhe 2 shtetaset e mitura 15-vjeçare, të cilat deklaruan se kishin ushtruar dhunë ndaj shoqes së tyre, shtetases së mitur 17 vjeçe, për motive të dobëta”, vijon njoftimi mbi procedimin e autoreve të dhunës.
Nga ana tjetër, jo vetëm akti i dhunës por edhe publikimi i videos në rrjet rreth një muaj më pas, ka ngritur shqetësime lidhur me fenomenin e bullizmit, gjuhës së urrejtjes dhe përmbajtjes denigruese.
Në një reagim zyrtar, Komisioneri për Mbrojtjen nga Diskriminimi ka dënuar aktet e dhunës dhe ka shprehur shqetësimin e thellë për filmimin dhe shpërndarjen e këtij akti në hapësirën publike online.
“KMD dënon çdo formë dhune, poshtërimi, bullizmi, nxitjeje të urrejtjes apo sjelljeje denigruese ndaj fëmijëve dhe të rinjve”, shkruhet në reagimin publik të Komisionerit për Mbrojtjen nga Diskriminimi.
“Asnjë konflikt, situatë personale apo marrëdhënie shoqërore nuk mund të justifikojë dhunën fizike, psikologjike apo ekspozimin publik të viktimës”, citon KMD.
Komisioneri bëri gjithashtu thirrje që këto pamje të mos shpërndahen më tej, pasi ripublikimi i tyre rrezikon riviktimizimin e fëmijës dhe cenon dinjitetin e saj.
