Prokuroria e Tiranës njoftoi të shtunën, më 31 janar, se ka depozituar në gjykatë kërkesë për konfiskimin e pasurive të familjarëve të Sajmir Alimehmetit, i dënuar në Shtetet e Bashkuara të Amerikës me 22 vite burg për vepra penale në fushën e akteve terroriste. Alimehmeti u akuzua se kishte siguruar dhe tentuar të siguronte mbështetje materiale për individë apo grupe të përfshirë në aktivitet terrorist, si dhe se ka bërë deklarim të rremë për t’u pajisur me pasaportë.
Ndaj tij, në Shqipëri ka filluar hetim për veprën penale “Pastrimi i produkteve të veprës penale ose veprimtarisë kriminale”, ndërkohë që në hetimin pasuror janë përfshirë edhe familjarët e tij.
Sipas prokurorisë, nga verifikimi i bërë në lidhje me Alimehmetin dhe familjarët e tij, ka rezultuar se ka transaksione financiare në banka shqiptare të nivelit të dytë, apo veprime të tjera ekonomike me vlera të larta, të cilat nuk mund të justifikohen me të ardhurat e krijuara ndër vite.
Megjithëse familjarët kanë deklaruar se të ardhurat i kanë krijuar nga qiratë dhe kursimet, prokuroria konstaton se nuk janë gjetur dokumente që provojnë këto deklarata dhe vlerat monetare për të cilat kërkohet konfiskimi. Për rrjedhojë, dyshohet se këto vlera nuk kanë prejardhje të ligjshme.
Prokuroria kërkon që të konfiskohen llogaritë e të afërmve të tij, me gjendje totale prej 15.5 milionë lekësh, 50 mijë dollarë amerikanë dhe 15 mijë euro.
