Ish-shefi krimeve në komisariatin nr.3 në Tiranë, Erjon Dani dhe dy persona të tjerë u deklaruan fajtorë të enjten më 5 shkurt nga Gjykata e Posaçme e Shkallës së Parë, për ushtrim të ndikimit të paligjshëm ndaj funksionarëve të drejtësisë. Ndaj Erjon Danit u caktua masa përfundimtare me 3 vjet burgim, që në aplikim të gjykimit të shkurtuar u reduktua nëë 2 vjet heqje lirie. Dani u deklarua i pafajshëm për veprën penale “Shpërdorimi i detyrës”. Dy të pandehurit e tjerë, Musa Gjikola dhe Vilson Roçi u dënuan me nga 1 vit e 6 muaj burgim, që me uljen e 1/3-ës si rrjedhojë e gjykimit të shkurtuar, mbeti nga 1 vit për secilin.
Të dhënat komprometuese për tre të dënuarit u siguruan gjatë një hetimi për trafik narkotikësh.
Sipas SPAK, nga hetimet e kryera ka rezultuar se gjatë vitit 2020, të pandehurit janë përfshirë në disa episode, ku kanë kërkuar dhe përfituar shuma monetare që varionin nga 4 000 deri në 7 500 euro, me pretendimin se kishin aftësinë për të ushtruar ndikim të paligjshëm ndaj funksionarëve të drejtësisë, duke premtuar ndikimin në masa sigurimi personal dhe favorizim në dhënie dënimi ndaj disa të arrestuarve.
Nga hetimet ka rezultuar se të pandehurit kanë bashkëpunuar duke i koordinuar veprimet përmes komunikimeve në platformën e koduar “Sky ECC.
Dani dhe dy të dënuarit e tjerë u arrestuan në korrik të vitit të kaluar.
