Prokuroria e Posaçme kundër Korrupsionit dhe Krimit të Organizuar, SPAK, njoftoi të shtunën më 7 shkurt përfundimin e hetimeve ndaj tre personave të akuzuar për ndikim të paligjshëm në procedurën e transferimit të një të dënuari në Turqi, një prej të cilëve oficer i Gardës së Republikës. Po ashtu, çështja penale është dërguar në gjykatë për kalimin për gjykim.
SPAK bëri me dije se gjatë hetimit është evidentuar edhe fakti i fillimit të ndjekjes së procedurës ligjore të transferimit nga ana e Ministrisë së Drejtësisë për shtetasin shqiptar të dënuar, Kujtim Çeliku, për të shlyer pjesën e mbetur të dënimit në Shqipëri. Megjithatë, në përgjegjësi penale janë vendosur vetëm tre të pandehurit, Zef Mali, Kreshnik Domi dhe Jemine Çoku, të cilët akuzohen për ushtrim të ndikimit të paligjshëm tek funksionarët e Ministrisë së Drejtësisë.
Hetimet e filluara bazuar në aktet e referuara nga Agjencia e Mbikëqyrjes Policore Tiranë kanë zbuluar se të pandehurit Zef Mali dhe Kreshnik Domi i kanë kërkuar dhe marrë motrës së të dënuarit në Turqi, Jemine Çokut, një përfitim të parregullt prej 20 mijë eurosh. Në kohën kur Zef Mali ka kryer këtë veprim, mbante detyrën e oficerit të Shtabit për Menaxhimin e Forcave në Gardën e Republikës, ndërsa Domi ishte një lidhje shoqërore e tij.
Sipas hetimeve, ata i kanë premtuar dhe siguruar të pandehurës Jemine Çoku se do të ushtrojnë ndikim të paligjshëm tek funksionarë të Ministrisë së Drejtësisë për të ndjekur procedurën e transferimit në Shqipëri të vëllait të saj, shtetasit shqiptar Kujtim Çeliku, i dënuar me burgim në Republikën e Turqisë.
Në njoftim bëhet me dije se nga muaji janar deri në tetor të vitit 2025, periudhë në të cilën ishte në zhvillim procedura e të dënuarit Çeliku, të pandehurit Zef Mali dhe Kreshnik Domi kanë mbajtur kontakte të vazhdueshme me të pandehurën Jemine Çoku dhe me familjarë të tjerë të saj, duke i siguruar se kishin mundësi të ndikonin tek funksionarë të Ministrisë së Drejtësisë për realizimin e procedurës së transferimit. Bazuar në këto premtime, Çoku u ka dhënë të pandehurve shumën prej 20 mijë eurosh, ndërkohë që ka filluar edhe procedura e transferimit.
