Në ditën e parë të deklaratave përmbyllëse në gjyqin për krime lufte ndaj ish-presidentit të Kosovës, Hashim Thaçi, dhe tre të tjerëve, në Dhomat e Specializuara të Kosovës në Hagë, të hënën, Zyra e Prokurorit të Specializuar (SPO) kërkoi dënim me 45 vjet burg për secilin nga katër ish-udhëheqësit e Ushtrisë Çlirimtare të Kosovës (UÇK).
“Zyra e Prokurorit të Specializuar ka kërkuar shpalljen fajtor për të gjitha 10 akuzat dhe dhënien e një dënimi të vetëm prej 45 vjetësh burg, bazuar në kontributet individuale në krimet e kryera nga secili nga Hashim Thaçi, Kadri Veseli, Rexhep Selimi dhe Jakup Krasniqi”, tha kryeprokurorja, Kimberly West, para gjykatës.
“Këto janë krime lufte dhe krime kundër njerëzimit dhe janë të rënda në natyrë. Dhe rëndësia e akuzave nuk është zvogëluar me kalimin e kohës”, shtoi ajo.
West theksoi se “nuk kërkohet shpallja fajtor dhe dënim ndaj Shtabit të Përgjithshëm, as ndaj UÇK-së. Po ashtu, nuk kërkohet as shpallja fajtor dhe nuk mund të shqiptohet asnjë dënim vetëm për faktin e anëtarësisë në Shtabin e Përgjithshëm ose në UÇK.”
Dhomat Speciale janë kritikuar gjerësisht nga shqiptarët etnikë, të cilët i konsiderojnë ato si gjykatë etnikisht e njëanshme dhe që synon të minojë trashëgiminë e asaj që ata e shohin si luftë të drejtë të UÇK-së kundër forcave serbe. Organizata e Veteranëve të Luftës së UÇK-së ka organizuar katër protesta të mëdha në Evropë në mbështetje të ish-udhëheqësve të UÇK-së që janë në gjyq. Megjithatë, prokurorët kanë këmbëngulur se vetë UÇK-ja nuk është në gjyq, pavarësisht perceptimit.
Thaçi, Krasniqi, Selimi dhe Veseli akuzohen për përgjegjësi individuale dhe komandante për krimet e kryera ndaj të burgosurve në objektet e mbajtjes të UÇK-së në Kosovë dhe në Shqipërinë fqinje, duke përfshirë 102 vrasje. Krimet dyshohet të jenë kryer gjatë dhe menjëherë pas luftës së Kosovës në vitet 1998–1999.
Thaçi u padit në tetor 2020 dhe dha dorëheqjen si president i Kosovës muajin pasues. Ai dhe të tjerët kanë qenë në paraburgim në Hagë që atëherë.
E ashtuquajtura gjykatë speciale është pjesë e sistemit të drejtësisë së Kosovës, por e vendosur në Hagë dhe përbëhet nga staf ndërkombëtar për të siguruar një proces të drejtë, pasi që kishin lindur probleme me kanosjen e dëshmitarëve në rastet e mëparshme të lidhura me UÇK-në. Shumë dëshmitarë të prokurorisë kanë dëshmuar pas dyerve të mbyllura për të mbrojtur identitetin e tyre nga frika e hakmarrjeve, por kjo ka sjellë akuza për mungesë transparence.
Prokuroria argumenton se Thaçi dhe katër të tjerët kishin përgjegjësi komanduese mbi luftëtarët e rangut të ulët dhe gjithashtu kryen edhe vetë krime. Mbrojtja ka pohuar se UÇK-ja nuk kishte një strukturë të duhur komanduese dhe se të akuzuarit nuk kishin autoritet për të mbajtur luftëtarët guerilë përgjegjës, pasi pushteti i vërtetë në UÇK mbahej nga komandantët e zonave operative.
Deklaratat përmbyllëse do të vazhdojnë deri më 18 shkurt, me një ditë pushimi në ditën e pavarësisë së Kosovës, më 17 shkurt.
Pas deklaratave përmbyllëse, paneli i gjyqtarëve ka 90 ditë kohë për të shqyrtuar vendimin e tij, që do të thotë se ai mund të jepet në pranverë.
