Prokuroria e Tiranës njoftoi të hënën pezullimin nga detyra të drejtorit të Financës dhe Shërbimeve Mbështetëse pranë Agjencisë së Mbikëqyrjes Policore, AMP, Gëzim Sala pasi është nën hetim për “shpërdorim detyre” për shkak se akuzohet se lejoi punësimin e 40-vjeçarit Muçi Shaljani, i cili mbeti i vrarë më 11 nëntor të vitit të kaluar në një atentat së bashku me Gilmando Danin.
Shaljani ishte duke drejtuar automjetin ku gjendej Dani, kur ata u sulmuan me armë zjarri në rrethrrotullimin e Rinasit. Hetime për çështje të tjera kanë zbuluar disa raste kur punonjësit e Policisë së Shtetit u kanë shërbyer anëtarëve të krimit të organizuar.
Nga hetimet ka rezultuar se Shaljani ishte punësuar prej afro 2 muajsh, si punonjës i AMP-së në funksion ndihmëspecialist në Drejtorinë e Forcës së Posaçme Operacionale.
“Prokuroria provoi se dokumenti i gjendur këtij shtetasi ishte i falsifikuar, pasi nuk rezultonte që AMP ta ketë pajisur me dokument. Ky shtetas kërkoi të punësohej në AMP më 09.09.2025 dhe pranimi i tij më 15.09.2025, nëpërmjet një urdhri, rezulton haptazi në kundërshtim me ligjin ‘Për Agjencinë e Mbikëqyrjes Policore’ dhe Vendimin e Këshillit të Ministrave Nr.532, datë 29.07.2022 ‘Për Miratimin e Rregullores për Organizimin dhe Funksionimin e Agjencisë së Mbikëqyrjes Policore’”, citohet në njoftim.
Sipas prokurorisë, në këto akte ligjore dhe nënligjore përcaktohet qartë se rekrutimi i punonjësve të AMP-së bëhet nëpërmjet konkurimit, shpalljes së vendeve vakante, krijimit të komisioneve përkatëse, testimit, verifikimit përfundimtar për kualifikimin apo skualifikimin e aplikantëve deri në përpilimin e kontratës, urdhrin e emërimit në detyrë dhe periudhën e provës. Këto procedura nuk janë respektuar në punësimin e mikut të Danit.
Në njoftim sqarohet se Sala ka deklaruar para hetuesve se procedura e ndjekur për rekrutimin e Shaljanit nuk është ligjore dhe se ai në këtë proces ka nënshkruar miratimin vetëm për anën formale të akteve dhe jo në përmbajtje. Por, sipas prokurorisë, Sala ka kërkuar që ky urdhër të bëhej shpejt dhe me motivacionin se Shaljani do të pranohej me kontratë të përkohshme për nevoja emergjente.
Sipas Prokurorisë, Shaljani u punësua me një procedurë të paligjshme, pa aplikuar asnjë prej detyrimeve ligjore të shprehura në ligjin dhe rregulloren e AMP.
