Ish-ministri i Mbrojtjes, Fatmir Mediu paraqiti të martën më 24 shkurt në Gjykatën e Posaçme qëndrimet dhe komentet e tij lidhur me një pjesë të provave dhe argumenteve të SPAK për çështjen penale në ngarkim të tij për shpërdorim detyre, lidhur me rolin e tij në tragjedinë e Gërdecit.
Në fillim të seancës, avokati i Mediut, Henrik Ligori kërkoi përjashtimin e gjyqtares Irena Gjoka për papajtueshmëri me gjykimin e themelit të çështjes. Gjyqtarja Gjoka vërejti se, për këtë arsye, kishte kërkuar më parë heqjen dorë nga çështja dhe bëri me dije se kërkesa e përjashtimit do të shqyrtohet nga një tjetër gjyqtar.
Në vijim, Mediu parashtroi vetë qëndrimet lidhur me provat. Ai vërejti se, jo për fajin e tyre, kanë qenë në pamundësi për të administruar 14 fashikuj të dosjes. Megjithatë, ai paraqiti qëndrimet lidhur me 9 pyetje të ngritura nga SPAK. Sipas tij, SPAK ka paraqitur si prova procesverbale të këqyrjes së vendit të ngjarjes dhe për kontrolle të banesave të personave të hetuar; akt-ekspertime të viktimave apo akte-ekspertimi lidhur me mbikqyrjen e monicioneve, të cilat nuk kanë asnjë lidhje me procesin e tij. Mediu nënvizoi se prokuroria nuk ka paraqitur asnjë argumentim apo arsyetim që të lidhi këto akte me detyrën dhe përgjegjësitë e tij si ish-ministër.
Sipas tij, vetë SPAK ka thirrur si dëshmitarë funksionarët e forcave të armatosura, pasi ata kanë lidhje me këtë njgarje. “Nëse do të kishte përgjegjësi ministri, atrëherë do ishin thirrur ish-ministrat”, u shpreh Mediu.
Ai parashtroi qëndrimet e tij të përsëritura dhe në seancat e mëparshme se akti ekspertimit i nënshkruar nga dy ekspertë amerikanë, nuk përcakton se zjarri është shkaktuar nga saldimi i një karroce, ashtu si pretendon SPAK. Sipas Mediut, përfundimet e ekspertëve amerikanë nuk kanë përcaktuar një shkak konkret për shkaktimin e zjarrit.
Ish-ministri cilësoi të pavlefshëm aktin e ekspertimit të kryer në hetimin e mëparshëm të kësaj ngjarje nga ekspertët shqiptarë me kërkesë të prokurorisë, duke pretenduar se ekspertët nuk kanë pasur kompetenca për një ekspertim të tillë.
Mediu theksoi se VKM-të e ngarkonin ministrin me detyra administrative dhe se për pjesën tjetër ishin forcat e armatosura përgjegjëse. Ai shmangu nga vetja të gjitha përgjegjësitë lidhur me mënyrën se si u krye procesi demontimit të municioneve luftarake në Gerdec. Pasi paraqiti kundërshtitë e tyij ndaj provave të rokurorisë për më shumë se dy orë, gjyqtarja Irena Gjoka konstatoi se duhet të vijonte në një tjetër process dhe e shtyu seancën për më datë 10 mars, në orën 09:00.
Gjatë një seance të zhvilluar më 23 dhjetor të vitit të kaluar, SPAK paraqiti provat në çështjen penale ndaj ish-ministrit të Mbrojtjes, Fatmir Mediu, duke theksuar se ai kishte dijeni për një vendimmarrje që lejoi demontimin e municioneve me kalibër të madh. Ndërkohë, u kërkua dhe administrimi i një faksi të dërguar nga Ministria e Drejtësisë, ku shënohet emri i djalit të ish-kryeministrit Sali Berisha.
Rihapja e çështjes ndaj Mediut u vu në lëvizje pas 12 vitesh, me iniciativën e familjes së një prej viktimave të shpërthimit të marsit 2008 në ambientet e ish-“Brigadës së Tankeve”, ku humbën jetën 26 persona dhe u plagosën qindra të tjerë. Sipas kërkuesve dhe SPAK, pas ndryshimeve ligjore të viteve 2012 dhe 2017, deputeti nuk ka më imunitet parlamentar për ndjekjen penale apo gjykimin e tij dhe, për rrjedhojë, nuk ekziston asnjë pengesë për hetimin dhe gjykimin e Mediut, i cili akuzohet për “shpërdorim detyre”.
Çështja ndaj Mediut kaloi për gjykim më 6 prill të vitit 2023 dhe ndodhet aktualisht në fazën e paraqitjes së provave nga ana e SPAK.
