Gjykata e Posaçme e Shkallës së Parë vendosi të premten, më 6 mars, kalimin për gjykim të çështjes penale në ngarkim të ish-drejtorit të Përgjithshëm të Burgjeve, Agim Ismaili, ish-drejtorit të paraburgimit të Vlorës, Zambak Gjoni, si dhe ish-punonjësit të Inspektoratit të Mbrojtjes së Territorit, Arnold Rrokaj, të akuzuar për sulmin kibernetik ndaj Prokurorisë së Posaçme, SPAK.
Sistemi kompjuterik i SPAK u sulmua më 12 mars të vitit 2025 dhe ndërhyrja u zbulua disa ditë më vonë. SPAK njoftoi në atë kohë se ishte vënë në shënjestër nga një ndërhyrje e paligjshme në adresat e email-eve të prokurorëve të posaçëm. Sipas njoftimit të institucionit, u tentua të ndërhyhej edhe në email-in e ish-drejtuesit të SPAK, Altin Dumani.
Nga hetimet u identifikuan si përgjegjës për këtë sulm kibernetik tre të pandehurit: Agim Ismaili, Zambak Gjoni dhe Arnold Rrokaj. Ismaili, i akuzuar se ka kërkuar vijimin e hakerimit për persona të ndryshëm, u hetua në gjendje të lirë, ndërsa dy të pandehurit e tjerë u arrestuan.
Sipas SPAK, i pandehuri Arnold Rrokaj ka aksesuar në mënyrë të paautorizuar materiale hetimore, një pjesë e të cilave janë dërguar në mënyrë të paligjshme tek dy të akuzuarit e tjerë, Zambak Gjoni dhe Agim Ismaili. Këta të fundit dyshohet se i kanë shpërndarë të dhënat e dosjeve tek persona të tretë.
