Autoriteti për Informimin mbi Dokumentet për Ish-Sigurimin e Shtetit (AIDSSH) ka miratuar më 9 Mars Udhëzuesin e Ri për për “Qartësimin e Fatit të Personave të Zhdukur dhe të Ekzekutuar Gjatë Regjimit Komunist”.
Ky udhëzues bazohet në Ligjin “Për të Drejtën e Informimit për Dokumentet e ish Sigurimit të Shtetit të Republikës Popullore Socialiste të Shqipërisë”, të ndryshuar, si edhe mbi legjislacionin shqiptar për arkivat, Rregulloren e Organizimit dhe Funksionimit të AIDSSH.
Hartimi i tij synon rritjen e transparencës institucionale, forcimin e integritetit të procesit dhe garantimin e një qasjeje të standardizuar në përputhje me kuadrin ligjor në fuqi.
“Udhëzuesi ka për qëllim qartësimin e fatit të personave të zhdukur dhe të ekzekutuar gjatë periudhës së komunizmit në Shqipëri, krijimin e bazës dokumentare për procesin e identifikimit dhe rikuperimit të eshtrave të personave të zhdukur, si edhe realizimin e së drejtës së personave të zhdukur, për familjarët e tyre dhe shoqërisë për t’u informuar”, citon neni 2 i këtij udhëzuesi mbi qëllimet kryesore të tij.
Autoriteti i Dosjeve u bëri thirrje familjarëve të personave të zhdukur gjatë periudhës 1944–1991, si edhe palëve të tjera të interesuara, që të njihen me udhëzuesin për të forcuar transparencën në trajtimin e kërkesave për qartësimin e fatit të këtyre personave.
“Miratimi i këtij udhëzuesi përbën një hap të rëndësishëm në përmirësimin e praktikave administrative dhe në mbështetje të përpjekjeve për zbardhjen e fatit të personave të zhdukur gjatë regjimit komunist, duke i dhënë familjarëve një mekanizëm më të qartë procedural për ndjekjen e kërkesave të tyre” shkruan njoftimi i Autoritetit të Dosjeve.
Tre dekada nga rënia e komunizmit, mijëra familje shqiptare janë ende në pritje për të mësuar se si dhe ku u vranë të afërmit e tyre.
Numri i saktë mbetet i paqartë: qeveritë post-komuniste të të gjitha krahëve nuk e kanë përcaktuar dot këtë. Shumica e vlerësimeve thonë se ishin rreth 6,000 njerëz që u vranë ose vdiqën në burgjet shtetërore midis vitit 1944 dhe 1991, trupat e tyre nuk u kthyen gjetën më kurrë.
