Gjykata e Lartë vendosi të enjten më 9 prill që të mos pranojë rekursin e ushtruar nga ish zv.kryeministrja Belinda Balluku kundër masës së sigurimit personal “ndalim i daljes jashtë shtetit”, e caktuar pasi SPAK e mori atë të pandehur për veprën penale të shkeljes së barazisë në tendera. Po ashtu, u vendos mospranimi i rekursit të ushtruar pranë Gjykatës së Lartë nga ish-kreu i KESH, Erald Elezi, ndaj masës së arrestit shtëpiak.
Vendimi u mor nga Kolegji i Gjykatës së Lartë i përbërë nga gjyqtarët Ilir Panda, Albana Boksi dhe Genti Shala.
Dy ditë më parë, Gjykata e Posaçme e Apelit miratoi vendimin e Shkallës së Parë, për vijimin e masës tjetër së sigurimit personal të caktuar ndaj Ballukut, atë të pezullimit nga detyra.
Përveç çështjeve për shkelje të barazisë në tenderat me vlerë qindramilionë euro për infrastrukturën rrugore, SPAK ka regjistruar dhe një tjetër procedim penal bazuar në një kallëzim të kryer nga Adriana Kalaja, e cila pretendon se ish ministrja Balluku dhe ish zëvendësi i saj, Ceno Klosi, kanë përfituar tenderat e institucionit që drejtonin.
Kryeministri Rama udhëhoqi një betejë ligjore në Gjykatën Kushtetuese për të bllokuar pezullimin nga detyra të Ballukut, ndërkohë që mazhoranca e tij në Kuvend mbajti peng prej rreth dy muaj kërkesën e SPAK për autorizimin e masës së arrestit ndaj ish zv.kryeministres. Ai e shkarkoi Ballukun nga detyrat si zv.kryeministre dhe ministre e Energjisë e Infrastrukturës më 26 shkurt.
Më datë 12 mars, mazhoranca socialiste rrëzoi kërkesën e SPAK për arrestimin e Ballukut, që sipas prokurorëve është e nevojshme pasi provat tregojnë qartë se persona të fortë e anëtarë të kabinetit të ish-ministres kanë kontaktuar dhe intimiduar dëshmitarët përmes shantazhit, kërcënimit për shkarkim nga detyra apo ofertave në para.
Grupi parlamentar i Partisë Socialiste e mbrojti Ballukun me pretendimin se rreziku i prishjes së provave nuk u provua me fakte reale. Ata i cilësuan parashtrimet e prokurorëve të Posaçëm si konsiderata, që në themel të tyre kishin ish-funksionin e ministrit që mbante Balluku.
