Në Gjykatën e Posaçme, përfaqësuesit ligjorë të zyrtarëve të Universitetit Bujqësor të Tiranës të akuzuar për shkelje në procedurat e disa tenderave, vijuan të premten më 10 prill me paraqitjen e bisedimeve përfundimtare. Përgjatë një ore, përfaqësuesja ligjore e të pandehurit Altin Murto parashtroi në mënyrë të detajuar qëndrimin dhe pretendimet ndaj akuzave të ngritura prej SPAK, lidhur me tre procedura tenderimesh.
Ajo e akuzoi prokurorinë për përzgjedhje të provave në mënyrë selektive, me qëllim ngritjen e akuzës. “Në akte ka prova shfajësuese për të mbrojturin prej meje, që nuk janë përzgjedhur nga prokurori. Prokurori e fillon nga fundi, tek kontrata dhe jo prej nga ka filluar problem,” u shpreh ajo dhe nënvizoi se i pandehuri Altin Murto nuk kishte pasur dijeni se për kontaktet dhe marrëdhëniet e drejtuesve të universitetit me administratorët e kompanive që kishin fituar tenderat.
Sipas avokates, Murto ka pasur vetëm një telefonatë për arsye të punës së tij të përditshme, pasi duhej të çonte faturat. Por, sipas saj, edhe nga kjo telefonatë rezultonte qartë se Murto nuk ka pasur dijeni për dakordësitë që mund të ishin kryer nga eprorët, apo falsifikimet e shoqërive fituese.
“…Po bëhet përgjegjësia kolektive. Nëse flet administratori i institucionit me administratorin e shoqërisë, atëherë quhet përgjegjëse gjithë administrata. … Shkelja duhet të jetë me dashje. Veprimet e Altin Murtos janë rutinë administrative,” tha avokatja, e cila kërkoi shuarjen e çështjes për të pandehurit Murto.
Zyrtarët e Universitetit Bujqësor të Tiranës akuzohen se abuzuan me disa procedura prokurimi përmes falsifikimit të akteve me qëllim fryrjen e fondeve limit dhe paracaktimin e fituesve. Mes të pandehurve janë administratori i këtij universiteti, Edmond Tërthorja, dy zv/rektorët Romina Koto e Ilir Kapaj, akademikë e punonjës të tjerë. Në të njëjtën çështje, përfaqësuesit e kompanisë “Krijon” akuzohen për veprën penale të falsifikimit të dokumenteve të kryer në bashkëpunim.
Prokuroria e Posaçme ka kërkuar shpalljen fajtorë të të akuzuarve. Seanca e së premtes u shty për t’u dhënë kohë mbrojtësve të disa prej të pandehurve për të përgatitur dhe paraqitur bisedimet përfundimtare.
