Gjykata e Posaçme vendosi të premten më 17 prill deklarimin fajtor të ish-kryetarit të Bashkisë së Shkodrës, Bardh Spahia, për veprën penale të pengimit të ekzekutimit të vendimit të gjykatës, duke e dënuar atë me një gjobë prej 100 mijë lekësh.
Sipas vendimit të shpallur nga gjyqtarja Rudina Palloj, gjoba duhet të paguhet brenda gjashtë muajve nga momenti që vendimi merr formë të prerë.
SPAK kërkoi dënimin e Spahisë me 700 mijë lekë gjobë, ndërsa ky i fundit e ka kundërshtuar akuzën si te pabazuar dhe e ka cilësuar padinë si të ngritur politikisht.
SPAK e akuzoi Spahinë se, në cilësinë e kryetarit të Asamblesë së Përgjithshme të Ujësjellës Kanalizimeve Shkodër, ka marrë dy vendime në korrik të vitit 2022, për të liruar nga detyra administratorin e Ujësjellës Kanalizimeve, shtetasin M.M dhe ka emëruar në këtë detyrë shtetasin A.B.
I larguari nga detyra ka ushtruar padi në gjykatë, që e ka pranuar kërkesën e tij dhe po ashtu ka vendosur pezullimin e dy akteve të nxjerra nga Spahia për emërimin e administratorit të ri, deri në marrjen e vendimit të formës së prerë nga gjykata lidhur me këtë çështje.
Sipas SPAK, ish-kryebashkiaku Spahia, megjithëse ka qenë në dijeni të vendimit të gjykatës që ishte i qartë dhe i ekzekutueshëm në mënyrë të menjëhershme, e ka anashkaluar këtë urdhërim gjyqësor. Spahia ka nxjerrë disa ditë më vonë tre vendime të tjera në kundërshtim me vendimin e gjykatës. Këto veprime u konsideruan prej prokurorisë se janë kryer me qëllim pengimin e ekzekutimit të vendimit gjyqësor të Gjykatës së Rrethit Gjyqësor Shkodër.
