Sipas të dhënave më të fundit për vitin 2025, fluksi i migrimit të paligjshëm ka rënë në nivelet më të ulëta të regjistruara në një dekadë. Gjatë gjithë vitit janë identifikuar vetëm 380 raste hyrjesh të parregullta, përfshirë 255 mbërritje me varka të vogla, ndërsa pjesa tjetër janë zbuluar në porte ose brenda territorit britanik.
Autoritetet britanike e lidhin këtë rënie të fortë me marrëveshjen e bashkëpunimit mes Shqipërisë dhe Mbretërisë së Bashkuar të nënshkruar në fund të vitit 2022, e cila përfshiu kthime të përshpejtuara të emigrantëve të paligjshëm, operacione të përbashkëta policore dhe goditje ndaj rrjeteve të trafikimit.
“Ky është një partneritet i konsoliduar, me rezultate konkrete,” tha drejtuesi i policisë së shtetit Skënder Hita, gjatë një takim të martën me zëvendësambasadoren e Mbretërisë së Bashkuar në Shqipëri, znj. Julia Sutherland. “Policia e Shtetit mbetet një partner i besueshëm dhe aktiv në garantimin e sigurisë, brenda dhe jashtë vendit”, shtoi ai.
Statistikat tregojnë se struktura e migrimit mbetet e pandryshuar. Shumica dërrmuese e shqiptarëve që migrojnë në mënyrë paligjshme në Mbretërinë e Bashkuar janë meshkuj në grup moshën 18-39 vjeç, ndërsa gratë dhe të miturit përbëjnë një përqindje të vogël.
Të dhënat tregojnë se fenomeni mbeti regjistroi një rritje pas vitit 2020. Gjatë periudhës 2018–2020, autoritetet britanike regjistronin mesatarisht 200-350 raste në tremujor, që përfshinin hyrje me dokumente të paligjshme në aeroporte, porte ose persona të identifikuar brenda territorit të Mbretërisë së Bashkuar.
Në këtë periudhë, mbërritjet me varka të vogla përbënin vetëm një pjesë shumë të vogël të rasteve. Situata ndryshoi ndjeshëm në vitin 2021, kur numri i shqiptarëve që përdorën rrugën detare të “Kanalit Anglez” filloi të rritet.
Në tremujorin e tretë të atij viti u regjistruan 241 shqiptarë që mbërritën me varka të vogla, ndërsa në tremujorin e katërt shifra u rrit në 551 persona, duke sinjalizuar shndërrimin e kësaj rruge në kanalin kryesor të migrimit të parregullt drejt Britanisë.
Kulmi historik u arrit në vitin 2022. Vetëm në tremujorin e tretë të vitit 2022, autoritetet britanike identifikuan 9,044 shtetas shqiptarë që mbërritën me varka të vogla, ndërsa në tremujorin e dytë të po atij viti u regjistruan edhe 2,194 raste të tjera. Në total, gjatë vitit 2022 u identifikuan mbi 13 mijë hyrje të parregullta, duke e bërë Shqipërinë një nga kombësitë kryesore në këtë rrugë migrimi.
Pas këtij kulmi, trendi ndryshoi shpejt. Në vitin 2023, numri total i rasteve ra në vetëm 1,190 për gjithë vitin, ndërsa mbërritjet me varka të vogla u reduktuan ndjeshëm në disa dhjetëra ose qindra për tremujor.
Rënia vazhdoi edhe gjatë vitit 2024, kur autoritetet britanike regjistruan 840 raste në total gjatë gjithë vitit, një nivel shumë më i ulët krahasuar me vitet e mëparshme.
