Prokuroria e Fierit njoftoi të martën më 21 prill përfundimin e hetimit pasuror ndaj të hetuarit Ardit Hyka* dhe personave të lidhur me të, pasi vlerësohet se janë krijuar nga të ardhurat e përfituara nga veprimtari të dyshuara kriminale. Sipas prokurorisë, Hyka është dënuar nga drejtësia Italiane për veprimtari të paligjshme të lidhura me lëndët narkotike.
Organi i akuzës bën me dije se është kërkuar konfiskimi i pesë apartamenteve, dy njësive, rreth 17 mijë m2 tokë arë, si dhe kuotat që familjarët e Hykës kanë zotëruar në pesë shoqëri. Nga hetimi ka rezultuar se njëra prej kompanive të babait të Hykës ka deklaruar financimin e shoqërisë me një vlerë prej 100 milionë lekësh, që nuk justifikohet me burime të ligjshme financimi. Nëpërmjet kësaj shoqërie, janë krijuar më vonë edhe kompanitë e tjera të shpërndara midis anëtarëve të familjes.
“Po ashtu rezultoi se janë kryer veprime fiktive me qëllim justifikimin e kësaj shume monetare, të cilat nuk mbështeteshin në mundësinë reale financiare për marrjen e kësaj shume nga burime të ligjshme. Përkundrazi, evidentohet se shumica e veprimeve janë kryer jashtë sistemit bankar, në ‘cash’ dhe nëpërmjet akteve jo noteriale, me qëllim shmangien e origjinës së ligjshme të fondeve të investuara në shoqëri”, citohet në njoftim.
Ndërkohë, sipas prokurorisë, shuma 100 milionë lekë që ka mbetur e pajustifikuar me burime të ligjshme, ka shërbyer si bazë për zhvillimin e aktivitetit ekonomik të shoqërive në vijim. Kjo vlerë monetare është reflektuar në pasqyrat financiare si burim i ligjshëm dhe më pas është përdorur për investime të ndryshme, përfshirë blerjen e automjeteve dhe krijimin e të ardhurave që janë shpërndarë në formë page dhe dividendi.
“Më tej, këto të ardhura janë rinvestuar në pasuri të paluajtshme dhe kuota shoqërish, duke krijuar një cikël ekonomik që mbështetet në një burim fillestar të pajustifikuar”, vlerëson prokuroria e Fierit.
Shtetasi Ardit Hyka rezulton i dënuar nga autoritetet italiane për veprën penale “Përfitimi i të ardhurave që burojnë nga aktivitetet kriminale, drogë”. Sipas prokurorisë, ai ka sjellë në Shqipëri vlera monetare që buronin nga veprimtaria kriminale në fushën e narkotikëve.
Po ashtu, hetimet kanë zbuluar se disa shoferë të punësuar në shoqëritë në zotërim të subjekteve në këtë hetim, “Arjani” sh.p.k. dhe “Arjani Travel” sh.p.k,, janë konstatuar duke sjellë vlera monetare të padeklaruara në kufi, në rrethana të dyshimta mbi origjinën e tyre.
Në përfundim, prokuroria e Fierit i kërkon gjykatës konfiskimin e pesë apartamenteve në Fier me sipërfaqe totale 513 m2; dy njësi, një në Tiranë me sipërfaqe 17.1 m2 dhe një në Vlorë 31 m2; tokë arë me sipërfaqe totale rreth 17 mijë m2; si dhe kuotat e shoqërive “Arjani” sh.p.k., “Arjani Travel”, “Autoline Ital”, “Arkleand Bus” dhe “M. T.” sh.p.k.
*Shkrimi u amendua për të korrigjuar emrin e subjektit të hetimit pasuror, Ardit Hyka.
