Gjykata e Posaçme e Apelit për Korrupsionin dhe Krimin e Organizuar rrëzoi të hënën kërkesën e Metës për zëvendësimin e masës së sigurisë “arrest në burg” me një masë më të lehtë.
Sipas një njoftimi zyrtar, gjyqtarja Saida Dollani vendosi mospranimin e ankimit të paraqitur nga Meta, i cili përmes avokatit të tij kishte kërkuar ndryshimin e masës në “arrest shtëpie”, garanci pasurore, detyrim paraqitjeje apo ndalim të daljes jashtë shtetit.
Ankimi kundërshtonte një vendim të mëparshëm të Gjykatës së Posaçme të Shkallës së Parë, të datës 24 mars 2026, që kishte lënë në fuqi masën e arrestit në burg.
Ish-presidenti Ilir Meta dhe ish-bashkëshortja e tij, Monika Kryemadhi, janë marrë të pandehur nga GJKKO për akuzat e korrupsionit dhe pastrimit të parave. Kryemadhi dhe Meta i kundërshtojnë akuzat e SPAK si të pabazuara dhe politike, ndërsa ish-presidenti e ka cilësuar mbajtjen e tij në paraburgim si “pengmarrje”.
Prokuroria e Posaçme e akuzon Metën për ndikime korruptive dhe përfitime monetare në çështjen CEZ-DIA, në një marrëveshje interkoneksioni, si dhe për një marrëdhënie të dyshuar korruptive për ndryshimin e një ligji në favor të biznesmenit Samir Mane.
Sipas SPAK, akuza të ngjashme rëndojnë edhe mbi deputeten Kryemadhi. Nën hetim për këto çështje janë edhe ish-kreu i AKEP, Piro Xhixho, dhe Ema Çoku, një financuese e LSI-së.
