Sipas organit të akuzës, të pandehurit me inicialet A.C., A.G., G.G. dhe V.J. dyshohet se kanë vepruar në bashkëpunim për të kryer një sërë transaksionesh dhe veprimesh bankare fiktive, me qëllim fshehjen e origjinës së paligjshme të parave.
Hetimet, të zhvilluara në kuadër të procedimit penal nr. 1280 të vitit 2021, kanë dokumentuar kryerjen e kontratave të ndryshme, përfshirë shkëmbime pronash, dhurime dhe shitje, të cilat sipas prokurorisë janë përdorur si mekanizëm për pastrimin e të ardhurave të dyshuara kriminale.
Prokuroria bëri me dije se shuma prej 500 mijë eurosh është sekuestruar gjatë hetimeve, ndërsa të pandehurit akuzohen për veprën penale “Pastrimi i produkteve të veprës penale ose veprimtarisë kriminale” me pasoja të rënda, të parashikuar nga neni 287/3 i Kodit Penal.
Të dhënat e Institutit Kombëtar të Statistikave tregojnë se në vitin 2025, veprat penale të lidhura me pastrimin e produkteve të krimit janë rritur me 11.1% krahasuar me një vit më parë.
